काठमाडौं (हाम्रो खेलकुद) – अल्ट्रा दौडमा अन्तर्राष्ट्रिय पहिचान बनाइसकेकी धाविका मिरा राईलाई सरकारले उपचार खर्चका लागि ५ लाख रुपैयाँ दिएको छ । युवा तथा खेलकुद मन्त्री दलजित श्रीपालीले शुक्रबार मन्त्रालयमा मिरालाई चेक हस्तान्तरण गरेका थिए । अल्ट्राका राष्ट्रिय तथा अन्तर्राष्ट्रिय गरि दर्जन भन्दा बढी उपाधि जितिसकेकी मिरालाई सरकारले आर्थिक सहयोग गरेको यो पहिलो पटक हो । जब की अल्ट्रा धावककै नाममा सरकारले सञ्जय पण्डितलाई पटक पटक आर्थिक सहयोग गरेको छ ।

घुँडाको शल्यक्रियापछि मिरा अहिले आराम गरिरहेकी छिन् । गत महिनामा मात्र उनी टेलीभिजन च्यानल नेसनल ज्योग्राफिकको एड्भेन्चर अफ द इयर अवार्डको मनोयनमा परेकी थिइन् । अवार्डको मनोनयन मिरासहित १० जना छन् ।
मनोनयनमा अन्वेषण, साहसिक खेल, संरक्षण तथा मानवीय क्षेत्रमा उत्कृष्ट काम गर्ने व्यक्तिहरूको नाम छनोट हुने गर्छ । मनोनयन परेका लागि नेसनल ज्योग्राफिकको वेबसाइटमार्फत भोटिङको व्यवस्था छ । ज्योग्राफिकले सर्वाधिक भोट ल्याउनेलाई एड्भेन्चर अफ द इयर घोषित गरिनेछ । नोभेम्बर ३ देखि सुरु भएको भोटिङ डिसेम्बर १६ सम्म चल्नेछ । विजेताको घोषणा जनवरीमा हुनेछ ।
मिराले गत बर्ष फ्रान्समा म्याराथन डु मोन्ट ब्लान्स नामक ८० किलोमिटर दौडमा उपाधि जितेपछि उनी चर्चामा आएकी थिइन् । उनले त्यो दौड १२ घन्टा ३२ मिनेट १२ सेकेन्डमा दौड पूरा गरेकी थिइन् । भोजपुरमा जन्मिएकी २७ बर्षे मिरा तत्कालिन नेकपा माओवादीकी लडाकु थिइन् । सेना समायोजनमा आयोग्य ठहरिएकी उनीले अल्ट्रा दौड सुरु गरेको केही महिनामै सफलता प्राप्त गरेकी थिइन् ।