काठमाडौं (हाम्रो खेलकुद) – प्रदेश १ को सेतो टोली दोहोरो जित निकाल्दै राजधानीमा जारी ‘गुरुङ स्पोर्ट्स हाउस कप’ राष्ट्रिय खुला भेट्रान्स पुरुष भलिबल प्रतियोगिताको क्वाटरफाइनलमा प्रवेश गरेको छ ।

नयाँ बसपार्कस्थित ढोरपाट स्पोर्ट्स क्लबको कोर्टमा बिहीबार दोहोरो जित निकाल्दै प्रदेश १ को सेतो टोलीले समूह ‘सी’ बाट अन्तिम आठको यात्रा तय गरेको हो । पहिलो खेलमा कर्पाकेली युवा क्लब पुर्वी चितवनलाई २५–१७ र २५–१८ को सोझो सेटमा पराजित गरेको सेतो टोलीले दोस्रो खेलमा धादिङ एडभान्सलाई २५–७ र २५–१९ को सोझो सेटमा पाखा लगायो ।

अर्काे खेलमा नेपाल भलिबल संघले प्रदेश १ को निलोसँग सुरुवाती सेट २०–२५ ले गुमाएपनि त्यसपछिको दुवै सेट २५–१५ र २५–१५ को सेटमा जित निकाल्दै विजयी सुरुवात गरेको छ । अर्काे खेलमा तनहुँ मिर्लुङले धादिङ एडभान्सलाई २५–१३ र २५–२३ ले पराजित गरेको छ ।

यस्तै मण्डली स्पोर्ट्स क्लबले प्रदेश १ रातोलाई १६–२५, २५–१९ र १५–१३ ले पराजित गरेको छ । यस्तै आयोजक गुरुङ स्पोर्ट्स हाउसले साझा यातायातलाई २५–२३ र २५–१८ ले पराजित गर्दै विजयी सुरुवात गरेको छ । लगातार दोस्रो हार बेहोरेपछि साझा यातायात समूह चरणबाटै बाहिरिएको छ । यस्तै सिपाडोल युवा क्लबले रोल्पा भलिबल संघलाई २५–१६, २५–२२ र १५–४ ले पराजित गरेको छ ।

गुरुङ स्पोर्ट्स हाउस प्रालिको आयोजनामा भएको प्रतियोगितामा १६ टोलीको सहभागिता रहेको छ । सहभागी टोलीलाई ४ समूहमा विभाजन गरिएको छ । लिग कम नकआउट पछि हरेक समूहका शीर्ष दुई टोलीले क्वाटरफाइनलमा स्थान बनाउनेछन् । (पार्क भलिबल) को एक टोलीमा पाँच खेलाडी हुनेछन् । चार खेलाडी कोर्टमा हुनेछन ।

४० वर्ष भन्दामाथिको खेलाडीहरुको सहभागिता रहने प्रतियोगिताको उपाधि विजेता टोलीले १ लाख ११ हजार १ सय ११ रुपैया पुरस्कार पाउनेछ । उपविजयी टोलीले ६१ हजार १ सय ११ तथा तेस्रो हुने टोलीले ३१ हजार १ सय ११ रुपैया पुरस्कार पाउने छन् । चौथो हुने टोलीले ११ हजार १ सय ११ रुपैया पुरस्कार पाउने छन् ।

प्रतियोगिताको सर्वाेत्कृष्ट खेलाडीले ५ हजार रुपैयाँ हात पार्नेछन् । व्यक्तिगत विधातर्फ उत्कृष्ट स्पाइकर, ब्लकर, डिफेन्डर, सर्भर र प्रशिक्षकले समान ३–३ हजार रुपैयाँ प्रदान गरिने आयोजकले जनाएको छ ।