विजय नेपाली, पोखरा

पोखरा रंगशालामा जारी आइटिएफ वल्र्ड टेनिस टुर जुनियर ५ अन्तरगत आज पहिलो चरणका सम्पूर्ण खेलहरु सम्पन्न भएका छन् । मंगलबार पुरुष र महिला व्यक्तिगततर्फ पहिलो चरणका खेलहरु सम्पन्न भएका हुन् भने सामुहिक विधा तर्फ प्रिक्वाटर फाइनलका सम्पुर्ण खेलहरु सम्पन्न भएका छन् ।

पुरुष तर्फको व्यक्तिगत प्रतिस्पर्धामा नेपालका आरभ सम्राट हाडाले मात्रै जित निकाले । उनले भारतका निशिल मिट्टाललाई ६–३ र ६–३ को सेटमा हराउँदै अन्तिम १६ मा प्रवेश गरेका हुन् । भारतका हितेश चौहानले ब्राजिलका ब्रेनो रोसेट्टो उर्भेन्जालाई, भारतकै चिन्मे मितुल पटेलले नेपालका राजविर प्रधानलाई, अमेरीकाका जय दत्तले नेपालका आर्यन गिरी र रुसका म्याटभे ग्रेसचेनरलाई हराउँदै अन्तिम १६ को यात्रा तय गरेका हुन् ।

महिला तर्फभने नेपालकी सलोनी तामाङले भारतकी रिसिता रेड्डी वासिरेड्डीलाई, भारतकी दिव्या भाटियाले नेपालकी सुवांङ्गी लक्ष्मी शाहलाई, भारतकै सुखमन्नि भण्डारीले नेपालीकै इशाश्री शाहलाई, तनुश्री पाण्डेले नेपालकी आज्ञा रेग्मी र श्रीनिधी रेड्डी अमिरेड्डीले रायना शाहलाई हराउँदै अन्तिम १६ मा प्रवेश गरेकी हुन् ।

महिला तर्फको समुहगत प्रतिस्पर्धामा भने नेपालको वर्चस्व रह्यो । अन्तिम ८ का लागि भएको प्रतिस्पर्धामा अभिलाषा र सलोनी तामाङको जोडीले भारतकी सुखमणी भण्डारी र हान्नाह नागको जोडीलाई हरायो, यस्तै रायना शाह र प्रकृती श्रेष्ठको जोडीले बेल्जियमकी सानोन बोभ्य र भारतकी मिल्ले चुगको जोडिलाई र आज्ञा रेग्मी र सुवाङ्गी लक्ष्मी शाहको जोडीले भारतकी श्रीनिधि रेड्डी अमिरेड्डी, तनुसको जोडीलाई हराउँदै अन्तिम आठमा प्रवेश गरेकी छिन् । नेपालकै श्रेया भट्राई र मुनमायाको जोडिलाई भारतकी दिव्या भट्राई र मिहेर मिश्रको जोडीले हरायो ।