काठमाडौं (हाम्रो खेलकुद) – नेपाली फुटबल टोलीका प्रशिक्षक राजुकाजी शाक्यले समयमा स्कोरिङ भएकै कारण एएफसी सोलिडारिटी कप जित्न सफल भएको बताएका छन् । मलेसियाको कुचिङमा मंगलबार राती मकाउलाई १–० ले हराउँदै नेपालले पहिलो पटक एसियाली फुटबल महासंघ (एएफसी) को आधिकारित प्रतियोगिता पहिलो पटक जितेको थियो ।

जापानी प्रशिक्षक ग्याटुको कोजीको नेतृत्वमा रहेको प्रशिक्षण टोलीमा शाक्य प्रशिक्षक छन् । बुधबार राती १० बजेको आसपास त्रिभुवन विमानस्थलबाट बाहिर निस्कने क्रममा शाक्यले भने,‘डिफेन्स लाइन र किपिङ हाम्रो पहिलादेखि नै राम्रो थियो । यो पटक स्कोरिङ पनि राम्रो भयो । त्यसैले जित सम्भव भयो ।’ शाक्यकै प्रमुख प्रशिक्षणमा गत फागुनमा नेपालले दक्षिण एसियाली खेलकुद (साग) को यू २३ फुटबलमा स्वर्ण जितेको थियो । अहिलेको टोलीमा पनि त्यति बेलाकै खेलाडीको बाहुल्यता छ ।
यसपटक च्याम्पियन हुने क्रममा टिमोर लिस्टेसँग गोलरहित बराबरी खेलेपनि त्यसपछि ब्रुनाईलाई ३–० हराउँदै सेमिफाइनल पक्का गरेको थियो । लाओसलाई सेमिफाइनलमा २–२ को बराबरीपछि टाइब्रेकरमा हराएको नेपालले फाइनलमा मकाउलाई पराजित गरेको थियो । ब्रुनाईविरुद्ध नवयुग श्रेष्ठ, भरत खवास र विमल घर्तीमगर ले तथा सेमिफाइनलमा विमल र अनन्त तामाङले गोल गरेका थिए । फाइनलमा एकमात्र गोल सुजल श्रेष्ठले गरेको थियो ।