धनगढी (हाम्रो खेलकुद) – आयोजक फारवेष्ट पशुपति युवा क्लव, शसस्त्र प्रहरी वल र सुदुरपश्चिम ११ सुदुरपश्चिमको सर्वाधिक पुरस्कार राशीको शुभश्री प्यालेस फारवेष्ट पशुपति कप २०७३ को सेमिफाइनलमा पुगेका छन् । योसँगै सेमिफाइनल समिकरण पुरा भएको छ । पेटला युवा क्लब मंगलबार नै अन्तिम चारमा पुगिसकेको छ ।

बिहानमा भएको खेलमा फारवेष्ट पशुपतिले हसनपुर युवा क्लवलाई ३-० हरायो । टोलीको जितमा कप्तान गजेन्द्र शाही, मणिराम चौधरी र कमल देउवाले गोल गरे । फारवेष्टले अव पटेलासँग सेमिफाइनल खेल्नेछ ।
दिउँसोको खेलमा शसस्त्र प्रहरी वलले अत्तरीयाको सिर्जनसिल युवा क्लवलाई पेनाल्टी सुट आउटमा ४-२ ले पराजित गरेको छ । साँझ तेस्रो खेलमा सुदुरपश्चिम ११ ले स्पोर्टस स्कुल फुटवल एकेडेमीलाई ६-० ले हराएको थियो । माधव भण्डारी र रामसिंह राना समान २ तथा जीवन चौधरी र विजय सिंहले समान १ गोल गरे । अर्को सेमिफाइनल सुदूरपश्चिम ११ र शसस्त्र प्रहरी वलबीच हुनेछ ।
फारवेष्ट पशुपति युवा क्लवको आयोजनामा भईरहेको प्रतियोगिताको विजेताले २ लाख र उपविजेताले १ लाख नगद पाउनेछन् । धनगढीको शुभश्री प्यालेस प्रा.लि.ले मुख्य प्रायोजन गरेको प्रतियोगिताका विभिन्न विधाका उत्कृष्ट खेलाडीहरु पनि जनही १० हजार पाउने आयोजक क्लबका सचिव ललित मिश्रले जानकारी दिए ।