काठमाडौं (हाम्रो खेलकुद) – नेपाल तेक्वान्दो एकेडेमी (एनटिए) ले दोश्रो हिरोज अन्तर्राष्ट्रिय तेक्वान्दो च्याम्पियनसिपमा पदक विजेता खेलाडीलाई बुधबार नगद सहित सम्मान गरेको छ । थाइल्यान्डको बैंककमा अक्टोबर २२ देखि २४ तारिखसम्म भएको प्रतियोगितामा नेपालले ४ स्वर्ण र ४ रजत पदक जितेको थियो । विवेक श्रेष्ठ र पुष्पप्रसाद गौतमले समान १ स्वर्ण र १ रजत पदक जितेका थिए ।

चन्दु शाही र प्रतिज्ञा भण्डारीले स्वर्ण पदक जितेका थिए । तिलक लामा र टिम प्रशिक्षक र व्यवस्थापक समेत रहेको अशोक खड्काले रजत जितेका थिए । राष्ट्रिय खेलकुद परिषद्का सदस्य–सचिव केशवकुमार विष्ट र सदस्य उपेन्द्र पौडेलले खेलाडीलाई सम्मान पत्र र १० हजार रुपैयाँ प्रदान गरे । नगद पुरस्कार युनिटी तेक्वान्दो एकेडेमी, हङकङका अध्यक्ष दिल गुरुङ र मकाउमा रहेका तेक्वान्दो प्रशिक्षक कृष्णशरण कार्कीले प्रायोजन गरेका हुन् ।
सोही कार्यक्रमलाई सदस्य–सचिव विष्टले एनटीएका अध्यक्ष समेत रहेका अशोकलाई स्वयंसेवक प्रशिक्षकको नियुक्ति दिने प्रतिबद्धता व्यक्त गरे । ‘अशोकले तेक्वान्दोको विकासका लागि एकल प्रयासमा धेरै गर्नु भएको छ । चोटका कारण उहाँले आफूले चाहे जस्तो खेलाडी जीवनलाई अगाडि बढाउन सक्नु भएन, विष्टले भने,‘ तेक्वान्दो प्रतिको समर्पण र लगाउको कदर गर्दै परिषद्ले उहाँलाई तेक्वान्दो स्वयंसेवक प्रशिक्षकको नियुक्ति दिने घोषणा गर्दछु ।’