विजय नेपाली, पोखरा

दि राइजिङ क्लब धरान र स्काई गोल्स काठमाडौंले ‘ए’ डिभिजन राष्ट्रिय फुटसल लिगअन्तर्गत सोमबार भएको खेलमा जित दर्ता गरेका छन् ।

पोखराको बहुउद्देश्यीय कभर्डहलमा सोमबार भएको खेलमा प्रभातफेरी युथ क्लब काठमाडौंलाई ११–६ ले पराजित गर्दै लिगमा लगातार दोस्रो जित दर्ता गरेको हो । दि राइजिङले पहिलो खेलमा स्काई गोल्समाथि ५–४ को प्रतिस्पर्धात्मक जित निकालेको थियो । दि राइजिङको जितमा रेवोस मास्के र बिकु तामाङले ह्याट्रिक पुरा गरे । मिलन राईले दुई तथा मिलन लिम्बु, दोर्जे तामाङ र सुदिप गुरुङले समान एक गोल गरे ।

प्रभातफेरीका धिरज श्रेष्ठले दुई तथा धिरज जोशी, राज पौडेल, सिजन गुरुङ र श्रीजेश पुरीले समान १-१ गोल गरे । ह्याट्रिक पुरा गरेका राइजिङका बिकु तामाङ प्लेयर अफ दि म्याच घोषित भए । उनले ५ हजार रुपैयाँ हात पारे । प्रभातफेरीले लगातार दोस्रो हार बेहोरेको हो । प्रभातफेरी यसअघि स्पोर्ट्स क्यासल पोखरासँग ७–० को फराकिलो अन्तरले पराजित भएको थियो । लगातार दोस्रो जितसँगै दि राइजिङको ६ अंक पुगेको छ । अंकविहीन प्रभातफेरी पुछारमा छ ।

यस्तै अर्का खेलमा स्काई गोल्स काठमाडौंले झरना स्पोर्ट्स क्लब रुपन्देहीलाई ८–० ले हराउँलै लिगमा पहिलो जित दर्ता गरेको छ । स्काई गोल्स पहिलो खेलमा दि राइजिङ क्लब धरानसँग ५–४ ले पराजित भएको थियो । झरनाको यो लगातार दोस्रो हार हो । यसअघि झरना रुपन्देही डर्वीमा लुम्बिनी फुटसलसँग ६–२ ले पराजित भएको थियो ।

स्काई गोल्सको जितमा निर्मल गुरुङ र प्रकाश महताराले समान दुई गोल गर्दा अनिल खड्का, आशिष सुनाम, सन्जोग चाम्लिङ र रोशन अधिकारीले समान एक गोल गरे । स्काई गोल्सका निर्मल गुरुङ प्लेयर अफ दि म्याच घोषित भए । उनले ५ हजार रुपैयाँ हात पारे । पहिलो जितसँगै स्काई गोल्स २ खेलबाट ३ अंक जोडेर दोस्रो स्थानमा उक्लिएको छ । स्पोर्ट्स क्यासल, लुम्विनी फुटसल र ढुकु फुटसल क्रमश तेस्रो चौथो र पाँचौ स्थानमा रहेको छ । झरना अंकविहीन हुदै नवौं स्थानमा छ ।

लिगमा मंगलबार तीन खेल हुनेछ । स्पोर्ट्स क्यासल पोखराले शंखमुल फुटसल, लुम्विनी फुटसलले सविन मेमोरियलसँग तथा फुटसल फाइभ धरानले ढुकु फुटसल काठमाडौंसँग खेल्दैछ । लिगमा सहभागी १० टोलीले एकल राउन्ड रोविन लिगबाट शीर्ष चार टोलीले प्ले अफमा स्थान बनाउनेछन् । पहिलो प्लेअफको विजेताले फाइनलमा स्थान बनाउने छ । तेस्रो र चौथो हुने टोलीबीच दोस्रो प्लेअफमा प्रतिस्पर्धा हुनेछ । एलिमिनेटरमा पहिलो प्लेअफमा पराजित हुने टोली र दोस्रो प्लेअफको विजेताले फाइनल प्रवेशका लागि खेल्नेछन् ।

लिगको विजेताले १० लाख रुपैयाँ पाउनेछ भने उपविजेताले ५ लाख रुपैयाँ पाउनेछ । लिगको विंगर (आला–पिभोट), डिफेन्डर (फिक्सो), उदियमान खेलाडी, गोलरक्षक र प्रशिक्षकले समान २५ हजार पाउनेछन् । हरेक खेलको म्यान अफ दि म्याचले ५ हजार पाउनेछन् ।

लिगबाट एशियाली फुटबल महासंघ (एएफसी) द्धारा आयोजना हुने एएफसी फुटसल एसियन कप २०२२ को छनोटका लागि नेपाली राष्ट्रिय फुटसल टिमका लागि खेलाडी छनोट गरिने छ । एन्फाले एन्फा फुटसल कमिटिको सिफारिसमा गौरव बस्नेतलाई नेपाली राष्ट्रिय फुटसल टिमको मुख्य प्रशिक्षक नियुक्त गरिसकेको छ । सोही छनोट खेलबाट नै बस्नतेले आफ्नो जिम्मेवारी सम्हाल्ने छन् ।