काठमाडौं (हाम्रो खेलकुद) – अखिल नेपाल फुटबल संघ (एन्फा) को फुटसल कमिटिले आउदो भदौ दोस्रो सातादेखि राष्ट्रिय फुटसल प्रतियोगिता आयोजना गर्ने तयारी थालेको छ ।

एन्फा अन्तरगतको फुटसल कमिटिका अध्यक्ष तथा एन्फाका केन्द्रिय सदस्य दावा लामाले इरानमा आयोजना हुने एएफसी फुटसल च्याम्पियनसिप २०२० को छनोट खेलका लागि प्रतियोगिता आयोजना गन लागिएको जानकारी गराए ।

राष्ट्रिय फुटसल च्याम्पियनसिपमा नेपालमा विधिवत् रुपमा दर्ता भइ सञ्चालनमा रहेका फुटसल हाउसहरुलाई नै क्लबको रुपमा अघि सारेर आयोजना हुनेछ । च्याम्पियनसिपमा २२ देखि २५ फुटसल टोलीको सहभागिता रहने अध्यक्ष लामाले बताए ।

उनका अनुसार यो प्रतियोगिता नेपाली राष्ट्रिय पुरुष फुटसल टिम छनोटको रुपमा रहनेछ । फुटसल प्रतियोगिता भदौ ९ गतेबाट २० गतेसम्म आयोजना हुनेछ ।

यस प्रतियोगिताबाट छनोट हुने खेलाडीले राष्ट्रिय टोलीमा स्थान बनाउनेछन् । यस प्रतियोगिताबाट प्रारम्भिक चरणमा ६० देखि ७० खेलाडी छनोट गरी प्रशिक्षणमा राखिने र यसबातै अन्तिम १० सदस्यीय टोली तयार पारिने अध्यक्ष लामाले बताए ।

एएफसी फुटसल च्याम्पियनसिप– २०२० को छनोट खेल इरानमा अक्टोबर १६ देखि २७ सम्म हुनेछ । फाइनल चरणका खेल भने फेब्रुवरी २७ देखि मार्च ८ गतेसम्म तुर्केमिनिस्तानमा आयोजना हुँदैछ । फाइनल चरणमा १६ टोली रहनेछन् ।