काठमाडौं (हाम्रो खेलकुद) – दोस्रो संस्करणको टफिचु जुनियर च्याम्पियन्ससिप कप फुटसल प्रतियोगितामा कौस्तुभ एकेडेमी, ड्याफोडिल स्कुल र किड्स् लर्निङले विभिन्न उमेर समूहमा उपाधि जितेका छन् ।

ग्रासरुट फुटसल एकेडेमीमा आइतबार भएको उपाधि भिडन्तमा कौस्तुभ यु–१५ मा, ड्याफोडिल यु–१३ मा र किड्स लर्निङ यु–११ मा च्याम्पियन बन्न सफल भएका हुन् । यु–१५ तर्फ कौस्तुभले सेन्ट जेभियरलाई ५–० को फराकिलो गोल अन्तरले पराजित गर्दै उपाधि जित्यो । यु–१३ मा ड्याफोडिलले संस्कृतिमाथि ९–१ को फराकिलो जित निकाल्दै उपाधि जित्न सफल भयो । यस्तै यु–११ तर्फ किड्स लर्निङले मंगलदीपमाथि २–० को जित निकाल्यो ।

यु–१५ तर्फ कौस्तुभका विवेश मगर प्रतियोगिताको सर्वाेत्कृष्ट खेलाडी घोषित भए । कौस्तुभका सुजन खवास उत्कृष्ट गोलरक्षक, गुरुकुलका आरभ खायजु उदियमान खेलाडी र उनी नै सर्वाधिक गोलकर्ता चुनिए । उदियमान टिम राजर्षि गुरुकुल र फेयर प्ले को उपाधि नेपाल तारा स्कुलले पायो । वन शर्मा पौडेले उत्कृष्ट प्रशिक्षक चुनिए ।

यु–१३ तर्फ ड्याफोडिलका कविर तामाङ मोस्ट भ्योलएबल खेलाडी, प्लेयर अफि दि टुर्नामेन्ट, सर्वाधिक गोलकर्ता र फाइनल खेलको म्यान अफ दि म्याच घोषित भए । ड्याफोडिलका पदम तामाङ गोलरक्षक र रोशन राज पन्त उत्कृष्ट प्रशिक्षक चुनिए । रोजबडले फेयर प्ले अवार्ड जित्यो । गुरुकुलका कर्णदिप श्रेष्ठ उदियमान खेलाडी र गुरुकुल नै उदियमान टिम बन्यो ।

यु–११ तर्फ किड्सका योगेश नेगी सर्वाेत्कृष्ट खेलाडी र सर्वाधिक गोलकर्ता बने । किड्सका कुलदेव तितुङ प्लेयर अफ दि टुर्नामेन्ट घोषित भए । किड्सकै अनिश लामा उत्कृष्ट गोलरक्षक र अमृत लामा उत्कृष्ट प्रशिक्षक बने । लिटिल एन्जल्र्सका प्रस्यान तुलाधर उदियमान खेलाडी बने । त्रि नेत्रले फेयर प्ले अवार्ड र गेट वे स्कुल उदियामान टोलीको अवार्ड पाए । विजयी खेलाडीहरुलाई नेपाली राष्ट्रिय फुटबल टोलीका गोलरक्षक किरण चेम्जोङ, आयोजक सुर्य नेपालका विभिन्न प्रतिनिधिहरुले पुरस्कृत गरे ।

सुर्य नेपाल प्राइभेट लिमिटेडको कन्फेक्सनरी ब्राण्ड टफिचुको प्रायोजन तथा ग्रास रुट फुटसलको आयोजनामा गत बिहीबारदेखि काठमाडौं उपत्यकाका विभिन्न ५ भेन्युमा भएको प्रतियोगिता भएको थियो ।

५ भेन्युको कार्यक्रम संयोजकमा ग्रासरुट फुटसल एकेडेमीका निर्देशक राजु श्रेष्ठ रहेका थिए । च्यासलमा हरि लामा, बिजी ब्रदर्शमा राज कुमार घिसिङ, शान्तिनगर फुटसलमा विनोद केसी र राजुकुमार पन्त, सामाखुशीमा सन्देश श्रेष्ठ र ग्रासरुटमा चेतन राज घिमिरेले भेन्युको को अर्डिनेटर गरेका थिए ।

५ भेन्युबाट यु–१३ र यु–१५ मा ५ टोलीले सेमिफाइनलमा स्थान बनाएका थिए । उनीहरुलाई दुई समूहमा विभाजन गरेर खेलाउदै शीर्ष दुई टोलीलाई फाइनल खेलाएका थिए । प्रतियोगितामा तीन विधामा विभिन्न ८७ स्कुलले सहभागिता जनाएका थिए ।