काठमाडौं (हाम्रो खेलकुद) – नेपालको पहिलो अन्तर्राष्ट्रिय फुटसलमा सहभागिताको अनुभव सुखद हुन सकेन । इरानमा जारी एएफसी फुटसल च्याम्पियनसिपमा नेपालले अहिले सम्म खेलेका दुवै खेल गुमाएको मात्र छैन, हारमा पनि गोलको भारी नै बोकेको छ ।

पहिलो खेलमा उज्वेकिस्तानसँग १४–१ को लज्जास्पद हार बेहोरेको नेपालले हिजोको किर्गिस्तानसँगको खेलमा भने कम गोल भएको मै सन्तोष मान्नु परेको थियो । हिजोको खेल नेपालले ५–० ले गुमाएको थियो ।

छनोट चरणबाट बाहिरि सकेको नेपालले आज अन्तिम खेलमा तुर्किमिनिस्तानको सामना गर्दैछ । दुवै खेल हार्दै तुर्किमिनिस्तान पनि छनोट चरणबाट बाहिरिसकेको छ । त्यसअर्थमा आजको खेल दुवैका लागि प्रतिष्ठाको खेल मात्र हुनेछ । नेपाल र तुर्किमिनिस्तानबीचको खेल नेपाली समय अनुसार साँझ ६ः४५ मा सुरु हुनेछ ।

समूहमा उज्वेकिस्तान र किर्गिज गणतन्त्रले दुवै खेल जितेका छन् । समान ६ अंक भएपनि गोलअन्तरमा उज्वेकिस्तान शीर्षस्थानमा छ भने किर्गिज दोस्रो स्थानमा छ । समूहका शीर्ष दुई टोली अर्को बर्ष चाइनिज ताइपेइमा हुने एएफसी फुटसल च्याम्पियनसिपका लागि छनोट हुनेछन् ।