काठमाडौं (हाम्रो खेलकुद) – नेपालले पटक अन्तर्राष्ट्रिय फुटसल प्रतियोगिताको सुरुआत नै नमिठो हारबाट गरेको छ । इरानमा शुक्रबारबाट शुरु भएको एएफसी फुटसल च्याम्पियनसिप छनोटको पहिलो खेलमा नेपाली राष्ट्रिय फुटसल टोलीले उज्वेकिस्तानसँग १४–१ को लज्जास्पद हार बेहोरेको छ ।

पोउर शरीफ फुटसल हलमा भएको खेलमा बलियो उज्वेकिस्तानसँग पहिलो हाफमै ७–० ले पछि परेको थियो । दोस्रो हाफमा उज्वेकिस्तानले थप ७ गोल थप्दा नेपालले एक गोल फर्काएको थियो । उज्वेकिस्तानको जितमा दिलसोड राख्मातोभले ह्याट्रिक गरे ।

त्यस्तै कप्तान अर्तर युनिसोभ, दिलमुराद सेभ्कातोभ, निशोनोभ खुसन्निदीन, चोरिभ दाभ्रोनले समान २ तथा फर्खुद अब्दुमाभिल्यानोभ, अनास्खन राखमाटोभ र दाभ्रोन्जोन अब्दुरखामनोभले समान १ गोल गरे । नेपालको लागि एक मात्र गोल कप्तान सुरज राउतले गरे ।

एसिया जोनको छनोट अन्तर्गत समूह ‘ए’ को नेपालले दोस्रो खेल सोमबार किर्गिस्तानसँग खेल्नेछ भने मंगलबार तुर्केमिनिस्तानसँग प्रतिस्पर्धा गर्नेछ । समूहका शीर्ष २ टोली अर्को बर्ष चाइनिज ताइपेहमा हुने एएफसी फुटसल च्याम्पियनसिपमा छनोट हुनेछन् ।