अर्जुन कार्की
बागलुङ – बागलुङमा पहिलोपटक आयोजना गरिएको धौलागिरी अञ्चल स्तरिय रश आवर फुटसल प्रतियोगिताको उपाधि नयाँ जिवन पुर्नस्थापना केन्द्रले जितेको छ । बागलुङ स्पोर्टस् क्लबलाई आज भएको फाइनलमा ९–७ ले हराउँदै नयाँ जीवनले उपाधि जितेको हो । नयाँ जीवनका लागि रोशन केसीले ४, सुनिल तामाङ, राजेश जिसी र गणेश थापाले समान १ गोल गरे ।

सुवास गुरुङको गोलबाट बागलुङ स्पोर्टस्ले अग्रता लिएपनि दास्रो हाफमा टोलीले अग्रता जोगाउन सकेन । बागलुङ स्पोर्टस्का लागि एक्लै ६ गोल गरे सुवास गुरुङ फाइनलको म्यान अफ दी म्याच घोषित भए । अर्को गोल किरण दुराले गरेका थिए । जिल्लामै पहिलो पटक आयोजना गरिएको फुटसलको उपाधि जितेको नयाँ जीवनले ५० हजार रुपैयाँ प्राप्त गर्यो । बागलुङ स्पोर्टस्ले २० हजार रुपैयाँ पायो ।

रश आवर फुटसल प्रा.लि. बागलुङले आयोजना गरेको प्रतियोगितामा बागलुङ स्पोर्टस्का सुवास सर्वोत्कृष्ट खेलाडी चुनिए । नयाँ जीवनका मञ्जेश राना मगर उत्कृष्ट गोलरक्षक र मनाव सेवा आश्रम अनुशासित टोली घोषित भए । उनीहरुले समान ३ हजार प्राप्त गरे ।

विजेता र उपविजेता टोलीका खेलाडीलाई बागलुङ नगरपालिकाका उपमेयर सुरेन्द्र खड्का, जिल्ला फुटसल संघका संस्थापक अध्यक्ष राम शर्मा र जिल्ला भूसंरक्षण कार्यालयका शेर बहादुर श्रेष्ठले पुरस्कार वितरण गरे । प्रतियोगिताका १४ टोलीको सहभागिता थियो ।