काठमाडौं (हाम्रो खेलकुद) – नेपाल खेलकुद पत्रकार मञ्च (एनएसजेएफ) दोस्रो सुर्यकुमार स्मृति मिडिया कप फुटसल च्याम्पियनसिपको समूह विजेता बन्दै सेमिफाइनलमा प्रवेश गरेको छ ।

भैसेपाटीस्थित गोलपोष्ट फुटसल एरिनामा आजबाट शुरु भएको दोस्रो संस्करणको च्याम्पियनसिपमा एनएसजेएफले गोल अन्तरमा फोटो पत्रकार समूह (पिजे) लाई पछि पार्दै समूह ‘ए’ को विजेता बन्दै सेमिफाइनलमा प्रवेश गरेको हो । मञ्चले पिजे क्लबसँग ५–५ गोलको बराबरी खेल्दा डिफेन्डिङ च्याम्पियन इमेज च्यानलमाथि ७–२ को जित निकाल्यो ।  यस्तै दोस्रो खेलमा नेपाल मण्डलमाथि ८–० को फराकिलो जित निकाल्दा समूह चरणको अन्तिम खेलमा सामुदायिक सुचना नेटवर्क (सिआइएन)माथि ७–१ को जित निकाल्यो ।

पिजेले इमेज च्यानलमाथि ३–२, सिआइएनमाथि ८–१ को जित निकाल्दा नेपाल मण्डलसँग वाक ओभर पायो । यस्तै समूह ‘बी’ बाट माउन्टेन टेलिभिजन र नेपाल टेलिभिजन समूह विजेता र उपविजेतको रुपमा अन्तिम चारमा प्रवेश गरे । नेपाल वान र बीबीसीले प्रतियोगिताबाट वाकओभर दिएका थिए । पहिलो सेमिफाइनलमा मञ्चले नेपाल टेलिभिजनसँग प्रतिस्पर्धा गर्दा दोस्रो सेमिफाइनलमा माउन्टेन टेलिभिजन र पिजे क्लबले सोमबार प्रतिस्पर्धा गर्नेछ । खेल बिहान ७ बजेपछि हुने आयोजकले जनाएको छ ।

प्रतियोगताको विजेताले ५० हजार प्राप्त गर्नेछन् । यस्तै दोस्रो हुनेले २५ हजार पाउनेछ । त्यस्तै, फेयर प्ले टिम पनि पुरस्कृत हुनेछ । स्वर्गीय पत्रकार सूर्यकुमार क्षेत्रीको सम्झनामा गतवर्ष देखि मिडिया कप प्रतियोगिता भैरहेको छ । खेल क्षेत्रको विकाससँगै स्वर्गीय पत्रकार क्षेत्रीको परिवारलाई सहयोग गर्ने उद्देश्यका साथ फुटसल कप आयोजना गरिएको आयोजक गोलपोष्ट स्पोट्स एन्ड ट्रेनिङ सेन्टरले जनाएको छ । प्रतियोगिताको सहआयोजकको रुपमा उज्यालो रेडियो नेटवर्क रहेको छ ।