काठमाडौं (हाम्रो खेलकुद) – राजधानीमा जारी एन्फा रेडबुल राष्ट्रिय फुटसल च्याम्पियनसिपमा ढुकु फुटसल र स्तुपा फुटसलले बराबरी खेलेका छन् ।

स्तुपा फुटसल बौद्धमा आइतबार भएको खेलमा ढुकुले घरेलु टोली स्तुपालाई ४–४ गोलको बराबरीमा रोक्दै अंक खोसेको हो । स्तुपा फुटसलमै भएको अर्काे खेलमा चौर रिक्रिएसनले रजनी फुटसलमाथि ६–५ को प्रतिस्पर्धात्मक जित निकाल्यो । यस्तै सामाखुशीले शंखमुलमाथि ८–७ को रोमाञ्चक जित निकाल्दा रेभ फुटसलले फुटसल भिलेजमाथि ८–२ को फराकिलो जित निकाल्यो ।

चौर रिक्रिएसन सेन्टर बाँसबारीमा खालीबारीले विजी फुटसलमाथि १–० को जित निकाल्दा धन्यन्तरीले हरिसिद्धिमाथि ५–२ को जित निकाल्यो । खुमलटारले स्वयम्भुमाथि ५–३ को जित निकाल्दा विजी ब्रदर्शले किक अफलाई ५–५ गोलको बराबरीमा रोक्दै च्याम्पियनसिपमा पहिलो अंक् जोड्न सफल भयो ।

समूह चरणको चार खेल सकिदा समूह ‘ए’ मा धन्यन्तरी ९ अंकसहित शीर्ष स्थानमा छ भने, ७ अंकसहित किकअफ दोस्रो स्थानमा छ । यस्तै समूह ‘बी’ मा चार खेलबाट १० अंकसहित चौर तालिकाको शीर्ष स्थानमा छ ।

सामाखुशीको १० अंक् नै भएपनि गोल अन्तरमा पछि पर्दै दोस्रो स्थानमा छ । हरेक समूहका दुई टोली सेमिफाइनलमा प्रवेश गर्नेछ ।

नेपालले अक्टोबर १३ देखि २२ तारिखसम्म इरानमा हुने एएफसी फुटसल च्याम्पियनसिपमा सहभागिता जनाउने प्रतियोगिताको खेलाडी छनोटको रुपमा हेरिएको प्रतियोगितामा विभिन्न १६ टिमले च्याम्पियनसिपमा लिग कम नकआउटका आधारमा खेलिरहेको छ ।

प्रतियोगिताको विजेताले पाँच लाख प्राप्त गर्नेछन् । यस्तै उपविजेताले २ लाख ५० हजार प्राप्त गर्ने आयोजकले जनाएको छ । यस्तै उत्कृष्ट गोलरक्षक, डिफेन्स, फरवार्ड र मिडफिल्डर र प्रशिक्षकले समान २०–२० हजार प्राप्त गर्नेछन् ।

प्रतियोगिता अन्र्तगत सोमबार स्तुपा फुटसल बौद्धमा खुमलटार र किक अफ, हरिसिद्धि र विजी ब्रदर्श, खालीबारी र धन्यन्तरी तथा स्वयम्भु र विजी ब्रदर्शबीच खेल हुनेछ ।
यस्तै चौर रिक्रिएसन सेन्टर बाँसबारीमा हुने खेलमा फुटसल भिलेजले शंखमुल, रजनीले सामाखुशी, स्तुपाले चौर तथा रेभ फुटसलले ढुकु फुटसलसँग खेल्नेछ ।