काठमाडौं (हाम्रो खेलकुद)– शंखमुल र सामाखुसी रेडबुल फुटसल लिगको उपाधिका लागि भिड्ने भएका छन् । ताहचल फुटसलसँग शुक्रबार ७–२ ले पराजित भएपनि पहिलो लेगको फराकिलो जितका कारण शंखमुल फाइनल पुग्न सफल भएको छ । पहिलो खेलमा शंखमुल ९–१ ले विजयी भएको थियो । समग्रमा ११–८ को अग्रताका साथ शंखमुल उपाधि नजिक पुगेको हो ।

दोस्रो लेगमा ताहचलका सुनिल बस्नेतले ह्याट्रिक गरे भने सुजित बुढाथोकीले २ तथा विशाल गुरुङ र अनिल तामाङले समान १ गोल गरे । शंखमुलका शेरबहादुर थापा मगर र विप्लवध्वज शाहले गोल गरे । ताहाचलका गोलकिपर विशाल गुरुङ म्यान अफ द म्याच घोषित भए ।

सामाखुसी बिहीबारनै फाइनलमा पुगिसकेको छ । किक अफ फुटसललाई समग्रमा ६–५ ले हराउँदै सामाखुसी अन्तिम दुईमा पुगेको हो । एएमए इभेन्ट दरबारमार्गको आयोजनामा नेपाली फुटसलमा सर्वाधिक पुरस्कार राशीको प्रतियोगितामा राजधानीको १६ टोलीको सहभागिता थियो ।

प्रतियोगिताको विजेता टोलीले १० लाख र दोस्रो हुने टोलीले ५ लाख रुपैयाँ प्राप्त गर्नेछन् । प्रतियोगिताका उत्कृष्ट खेलाडी र उत्कृष्ट गोलकिपरले समान ५० हजार रुपैयाँ पाउनेछन् । रेडबुल मुख्य प्रायोजक रहेको प्रतियोगितालाई फग बडी स्प्रे, जेडटीई मोबाइलले सहप्रायोजन गरेका छन् । रेडबुल फुटसल लिगको फाइनल पुस २३ गते हुनेछ ।