काठमाडौं (हाम्रो खेलकुद) –राजधानीमा जारी रेडबुल फुटसल लिग अन्तर्गत बिहीबार भएका खेलमा हरिसिद्धि फुटसलले फराकिलो जित हासिल गरेको छ । कीर्तिपुर फुटसलविरुद्धको खेलमा हरिसिद्धिले कीर्तिपुरलाई १९–४ को फराकिलो गोल अन्तरले पराजित गरेको हो ।

हरिसिद्धिको जितमा राजेश तुम्बापोले डबल ह्याट्रिक गरे भने लालबहादुर तामाङले ४, विकेश महर्जन ३, निरज महर्जन २, रफी महर्जन २, निकेश महर्जनले १ र अरुण लामाले १ गोल थपे । कीर्तिपुरका लागि प्रताप महर्जनले ह्याट्रिक गर्दा म्यान अफ द म्याच घोषित सुरज गुरुङले १ गोल फर्काए ।

समूह बीमा सामाखुसी फुटसल १२ खेलबाट १८ अंक जोड्दै लिगको शीर्ष स्थानमा छ भने १२ खेलबाटै २६ अंक जोडेको कुमारी फुटसल दोस्रो स्थानमा छ । १३ खेलबाट २३ अंक जोडेको हरिसिद्धि समूह बीको चौथो स्थानमा छ । कीर्तिपुर छैटौं स्थानमा छ ।

त्यसैगरी समूह एको खेलमा आदर्श फुटसलले ह्वाइट हर्स फुटसललाई ७–५ गोल अन्तरले पराजित गरेको छ । आदर्शका लागि राजु बुढाथोकीले ह्याट्रिक गरे भने समीरजंग कार्कीले २, अविरल रिजालले १ गोल गर्दा अर्को एक गोल ह्वाइट हर्सबाट आत्मघाती रुपमा प्राप्त ग¥यो । ह्वाइट हर्सका मञ्जिल महर्जनले २, मनोज प्रजापति १, रितेश लामाले १ र रवि सिलवालले १ गोल फर्का पनि टोलीलाई विजयी बनाउन सकेनन् । यस खेलको म्यान अफ द म्याच आदर्श फुटसलका राजु बुढाथोकी भए ।

समूह एमा १२ खेलबाट २८ अंक जोडेको किकअफले शीर्ष स्थान ओगट्दा १२ खेलबाट २८ अंक नै बटुलेको बानेश्वर रिक्रियसन सेन्टर दोस्रो स्थानमा छ । २३ अंक जोडेको ह्वाइट हर्स चौथो स्थानमा रहँदा आदर्श पाँचौं स्थानमा छ ।