काठमाडौं (हाम्रो खेलकुद) – जिल्लाको सबैभन्दा प्रतिष्ठित त्रिवेणी कपको २९औं संस्करणको राष्ट्रब्यापी फूटबल प्रतियोगिताको पुरस्कार राशिमा वृद्धि गरिएको छ ।

आयोजक त्रिवेणी युवा क्लब लमजुङले शनिबार सदरमुकाम बेशीशहरमा पत्रकार सम्मेलनको आयोजना गर्दै त्रिवेणी कप १२ देखि २१ पुससम्म बेंसीसहरको सहजी खेल मैदान (त्रिवेणी रंगाशाला) मा हुने र पुरस्कार राशिमा वृद्धि गरिएको जनाएको छ ।

वृद्धि भएको पुरस्कार राशि अनुसार प्रतियोगिताको विजेताले ५ लाख र त्रिवेणी कप प्राप्त गर्नेछ । दोस्रो हुनेले ३ लाख रुपैयाँ र रजतपदक प्राप्त गर्नेछ । सेमिफाइनलमा पराजित हुने टोलीले समान ५०–५० हजार रुपैयाँ प्राप्त गर्नेछ । सर्वाधिक गोलकर्ता र सर्वोत्कृष्ट खेलाडीलाई १५–१५ हजार रुपैयाँ प्रदान गरिनेछ ।

२८औं संस्करणको विजेताले ३ लाख तथा उपविजेताले १ लाख ५० हजार रुपैयाँ हात पारेको थियो । गत संस्करणमा आयोजक त्रिवेणीले नै उपाधि जितेको थियो । कोरोनाका कारण गत वर्ष हुन सकेको थिएन ।

एक टोलीमा ५ जना विदेशी खेलाडी राख्न पाउने भएपनि एकैपटक मैदानमा ३ जनालाई मात्र उतार्न पाइने नियम बनाइएको छ । करिब २५ टिमको सहभागिता हुने आकलन गरिएको प्रतियोगितामा प्याराफिटमा बस्नेका लागि ५० रुपैयाँको टिकट दर तोकिएको छ । प्रतियोगिताका लागि ३३ लाख ६० हजार रुपैयाँ खर्च हुने अनुमान गरिएको छ ।

कोभिड–१९ का कारण गत वर्ष स्थगित त्रिबेणी कपलाई निरन्तरता दिन क्लबका अध्यक्ष विनोद गुरुङको संयोजकत्वमा २३ सदस्यीय मूल आयोजक कमिटी गठन गरिएको छ । यस्तै क्लबले शनिबार क्लबका सल्लाहकार स्वर्गीय धर्मराज श्रेष्ठको परिवारलाई ५० हजार रुपैयाँ सहयोग गरेको छ ।