काठमाडौं (हाम्रो खेलकुद) – ललितपुरको ‘ए’ डिभिजन टोली रुस्लान थ्रीस्टार क्लबले बिहीबार तीन खेलाडीसँगको सम्झौता नविकरण गरेको छ ।

थ्री स्टारले आसन्न ‘ए’ डिभिजन लिगका लागि दक्षिण एसियाली कोटामा भारतीय फरवार्ड लालरम्मावियासँगको सम्झौता नविकरण गरेको हो । लालरम्मावियाले अघिल्लो सिजन थ्रीस्टारबाटै लिग खेलेका थिए । उनले गत सिजन लिग डेब्युमै मनाङविरुद्ध दुई गोल गरेका थिए । उनले २०७६ को लिगमा चार गोल गरेका थिए ।

लाल भारतीय आइ लिग क्लब एयजवाल एफसीमा आबद्ध थिए । यस्तै थ्रीस्टारले युवा मिडफिल्डर योगेश गुरुङ र डिफेन्डर मिन बहादुर धिमालसँग पनि सम्झौता नविकरण गरेको छ ।

नयाँ सिजनका लागि थ्री स्टारले यसअघि कप्तान विक्रम लामा, उपकप्तान अनन्त तामाङ, सन्जोक राई, निशान खड्का, मनग्य नकर्मी, सुसान श्रेष्ठ, मिक्चेन तामाङ, निशान खड्का र गोलरक्षक प्रिसोको सम्झौता नविकरण गर्दा नयाँ खेलाडीको रुपमा डोना थापा, आयुष घलान, राफयल रिमगागो, गोलरक्षक रोशन गुरुङ, लाकेन लिम्बु र हेमन्त थापामगरलाई अनुबन्ध गरिसकेको छ ।

लिगको मिति नजिकिदै गर्दा क्लबहरुले खेलाडी अनुबन्धसँगै अभ्यास खेललाई पनि निरन्तरता दिएका छन् । प्रि–सिजनमा थ्री स्टारले तीन मैत्रीपुर्ण खेल खेलिसकेको छ ।

लिग मंसिर ३ गतेबाट सुरु हुँदैछ । यसअघि कात्तिक २९ देखि लिग हुने तय थियो । थ्री स्टारले च्यासल युथ क्लबसँग खेल्दै लिगको सुरुवात गर्नेछ ।