एजेन्सी – अर्काे वर्ष एसियाली राष्ट्र कतारमा आयोजना हुने फिफा विश्वकप कतार २०२२ को युरोपियन छनोटमा आज (बिहीबार) राति विभिन्न चार समूहको १० खेलमा प्रतिस्पर्धा हुदैछ ।

पोर्चुगल, स्पेन, जर्मनी, क्रोएसिया र स्वीडेनले आ–आफ्नो प्रतिद्धन्द्धीसँग खेल्दैछ । समूह ‘ए’ मा रहेको पोर्चुगलले आयरल्यान्डसँग उसैको मैदानमा नेपाली समयअनुसार राति १ः३० बजे प्रतिस्पर्धा गर्दैछ । ६ खेलबाट १६ अंक जोडेर दोस्रो स्थानमा रहेको पोर्चुगल आयरल्यान्डलाई हराउँदै शीर्षस्थानमा उक्लने लक्ष्यमा हुनेछ । आयरल्यान्ड ५ अंक जोडेर चौथो स्थानमा रहेको छ ।

यही समूहमा अजरवैजान र लक्जेमवर्गबीच राति १०ः४५ बजे प्रतिस्पर्धा हुदैछ । शीर्षस्थानको सर्वियाको १७ अंक छ । सर्विया र अजरवैजानले समान ७ खेल खेलेका छन् । अन्य तीन टोलीले ६ खेल खेलेका छन् ।

समूह ‘बी’ मा स्पेनले ग्रीससँग राति १ः३० बजे उसैको मैदानमा खेल्दैछ । ६ खेलबाट १३ अंक बटुलेको स्पेन दोस्रो स्थानमा छ । ग्रीस ९ अंक जोडेर तेस्रो स्थानमा छ । सोही समूहमा शीर्षस्थानमा रहेको स्वीडेनले जर्जियासँग राति १०ः४५ बजे प्रतिस्पर्धा गर्दैछ । स्वीडेन १५ अंक जोडेर शीर्षस्थानामा छ । जर्जिया ४ अंक जोडेर चौथो स्थानमा छ ।

समूह ‘जे’ मा जर्मनीले लिचेस्टाइनसँग घरेलु मैदानमा खेल्नेछ । यो खेल राति १ः३० बजे हुनेछ । यही समूहमा अर्मेनिया र नर्थ म्यासेडोनियाबीच राति १०ः४५ बजे रोमानियाविरुद्ध आइसल्यान्ड राति १ः३० बजे खेल हुनेछ ।

जर्मनी २१ अंकसहित समूहको शीर्ष स्थानमा छ । लिचेस्टाइन १ अंक जोडेर पुछारमा छ । रोमानियाको १३ तथा नर्थ म्यासेडोनिया र अर्मेनियाको समान १२ अंक छ । आइसल्यान्डको ८ अंक छ ।

समूह ‘एच’ मा साविकको उपविजेता क्रोएसियाले माल्टासँग राति १ः३० बजे खेल्दैछ । सोही समयमा स्लोभाकियाविरुद्ध स्लोभेनियाबीच प्रतिस्पर्धा हुनेछ । त्यसअघि रसिया र साइप्रसबीच राति १०ः४५ बजे खेल हुनेछ ।

यो समूहमा रसिया १९ अंक जोडेर शीर्षस्थानमा रहँदा क्रोएसिया १७ अंक जोडेर दोस्रो स्थानमा छ । स्लोभाकिया र स्लोभेनियाको समान १० तथा माल्टा र साइप्रसको समान ५ अंक छ ।

अन्य खेल

समूह ‘ए’ – अजरवैजानविरुद्ध लक्जेमवर्ग (राति १०ः४५ बजे) र आयरल्यान्डविरुद्ध पोर्चुगल (राति १ः३० बजे)

समूह ‘बी’ – जर्जियाविरुद्ध स्वीडेन (राति १०ः४५ बजे) र ग्रीसविरुद्ध स्पेन (राति १ः३० बजे)

समूह ‘एच’ – रसियाविरुद्ध साइप्रस (राति १०ः४५ बजे), माल्टाविरुद्ध क्रोएसिया (राति १ः३० बजे) र स्लोभाकियाविरुद्ध स्लोभेनिया (राति १ः३० बजे)

समूह ‘जे’ – अर्मेनियाविरुद्ध नर्थ म्यासेडोनिया (राति १०ः४५ बजे), जर्मनीविरुद्ध लिचेस्टाइन (राति १ः३० बजे) र रोमानियाविरुद्ध आइसल्यान्ड (राति १ः३० बजे)