काठमाडौं (हाम्रो खेलकुद) – ललितपुर महानगरपालिका र धनगढी उपमहानगरपालिकाले उपमेयर कप राष्ट्रिय महिला लिग छनोटको सेमिफाइनलमा स्थान पक्का गरेका छन् ।

सातदोबाटोस्थित एन्फा कम्प्लेक्सको खेल मैदानमा मंगलबार भएको खेलमा ललितपुरले शिवसताक्षी नगरपालिका झापालाई ४–० ले पराजित गर्दै अन्तिम चारमा स्थान पक्का गरेको हो । ललितपुरको जितमा निर्मला विकले ह्याट्रिक पुरा गर्दा मनिषा सेनले एक गोल थपिन् । सबै चार गोल पहिलो हाफमा नै भएको थियो ।

छैटौं मिनेटमा नै निर्मलाको गोलबाट अग्रता लिएको ललितपुरले २२औं मिनेटमा निर्मलाकै गोलबाट अग्रता दोब्बर बनायो । ३५औं मिनेटमा निर्मलाले ह्याट्रिक पुरा गरिन् । ४३औं मिनेटमा मनिषाले गोल गर्दै ललितपुरको जित पक्का गरिन् ।

अर्काे खेलमा धनगढी उपमहानगरपालिका कैलालीले बाँसगढी नगरपालिका बर्दियामाथि १२–१ को फराकिलो जित निकाल्दै अन्तिम चारमा स्थान पक्का गरेको छ । धनगढीको जितमा चन्द्रा भण्डारी एक्लैले ५ तथा रेखा कुमारी पौडेलले ४ गोल गरिन् । सुरक्षा कुमारी सिंह, सरस्वती रोकाया र विर्सना चौधरीले समान एक गोल गर्दा बाँसगढीकी अमिशा कार्कीले एक गोल फर्काइन् ।

यसअघि सोमबार कन्काई नगरपालिका झापा र रोङ गाउँपालिका इलाम क्वाटरफाइनलमा स्थान बनाएका थिए । बुधबार गोदावारी नगरपालिका कैलाली र कन्काई नगरपालिका झापा तथा रोङ गाँउपालिका इलाम र गौरीगंगा नगरपालिका कैलालीबीच प्रतिस्पर्धा हुनेछ ।

प्रतियोगितामा सहभागी ३१ टोलीलाई १० समूहमा विभाजन गरिएको थियो । हरेक समूहको शीर्ष टोली नकआउट चरणमा प्रवेश गरेका थिए । प्रतियोगिताको विजेता र उपविजेता टोली राष्ट्रिय लिगमा छनोट हुनेछन् । यस्तै प्रतियोगिताको विजेताले ५ लाख नगद पुरस्कार पाउनेछन् । यस्तै उपविजेताले ३ लाख र फेयर प्ले टिमले ५० हजार तथा प्रतियोगिताको सर्वोकृष्ट खेलाडीले ५० हजार र विधागततर्फ उत्कृष्ट हुनेले समान २०–२० हजार प्राप्त गर्नेछन् ।