बेलबारी (हाम्रो खेलकुद) – च्याम्पियन हिमालयन शेर्पा क्लबका फरवार्ड विश्वास श्रेष्ठ चौथो अन्तर्राष्ट्रिय आमन्त्रण बेलबारी गोल्डकप फुटबल प्रतियोगितामा सर्वाेत्कृष्ट खेलाडी घोषित भएका छन् ।

शेर्पालाई बेलबारी गोल्डकपको च्याम्पियन बनाउने क्रममा विश्वासले महत्वपुर्ण प्रदर्शन गरेका थिए । उनले ३१ हजार रुपैयाँ र ट्रफी पाएका छन् । यस्तै राष्ट्रिय टोलीका सदस्य तथा नेपाल एपिएफ क्लबका फरवार्ड आशिष लामा प्रतियोगिताको सर्वाधिक गोलकर्ता बनेका छन् । उनले २१ हजार रुपैयाँ र ट्रफी हात पारे ।

आयोजक डागिहाट युथ क्लबका रोहन कार्की उदियमान खेलाडी घोषित भए । उनले ११ हजार रुपैयाँ हात पारे । व्यक्तिगत विधातर्फ च्याम्पियन शेर्पाकै खेलाडीले वर्चश्व जमाएका छन् । शेर्पाका किशोर गिरी उत्कृष्ट गोलरक्षक, शेर्पाकै एन्जल गुरुङ उत्कृष्ट डिफेन्डर चुनिए ।

शेर्पाका फरवार्ड मुटुम्बा उत्कृष्ट फरवार्ड तथा शेर्पाका युगल किशोर राई उत्कृष्ट प्रशिक्षक चुनिए । एपिएफका नवीन लामा उत्कृष्ट मिडफिल्डर चुनिए । उदियमानसँगै व्यत्तिगतका उत्कृष्टहरुले समान ११–११ हजार रुपैयाँ हात पारे ।

बुधबार हिमालय शेर्पाले विभागीय नेपाल एपिएफ क्लबलाई ३–१ ले हराउँदै उपाधि जितेको छ । उपाधिसँगै शेर्पाले ५ लाख रुपैयाँ हात पारेको छ । दोस्रो भएको एपिएफले २ लाख ५० हजार रुपैयाँ प्राप्त गरेको छ । विजयी टोली तथा खेलाडीलाई प्रदेश १ का आन्तरिक कानुनमन्त्री केदार कार्की लगायतले पुरस्कृत गरे ।

११ कात्तिकबाट सुरु भएको प्रतियोगितामा सहभागी ८ टोलीलाई दुई समूहमा विभाजन गरिएको थियो । टुबोर्ग प्रायोजक रहेको प्रतियोगिताको मुख्य सहयोगीमा बेलबारी नगरपालिका, सह प्रायोजकमा लक्ष्मी सामुदायिक वन, बेलबारी नगरपालिकाका सबै वडा, सहयोगीमा मल्टीमिशन ट्रेनिङ सेन्टर धरान तथा प्राविधिक सहयोग मोरङ जिल्ला फुटबल संघ रहेको थियो ।

विधातर्फ उत्कृष्ट

सर्वाेत्कृष्ट खेलाडी – विश्वास श्रेष्ठ (शेर्पा)

उदियमान खेलाडी – रोहन कार्की (डागिहाट युथ क्लब)

सर्वाधिक गोलकर्ता – आशिष लामा (एपिएफ)

गोलरक्षक – किशोर गिरी (शेर्पा)

डिफेन्स – एन्जल गुरुङ (शेर्पा)

मिडफिल्डर – नवीन लामा (एपिएफ)

फरवार्ड – मुटुम्बा (शेर्पा)

प्रशिक्षक – युगल किशोर राई (शेर्पा)