बेलबारी (हाम्रो खेलकुद)– ए डिभिजन टोली हिमालयन शेर्पा क्लब चौथो अन्तर्राष्ट्रिय आमन्त्रण बेलबारी गोल्ड कप फुटबल प्रतियोगिताको फाइनलमा पुगेको छ ।

मोरङको लक्ष्मीमार्गमा जारी प्रतियोगिताको सोमबार भएको पहिलो सेमिफाइन्लमा झापा धुलाबारीको रोलिङ्ग क्लबलाई ३–१ ले हराउँदै हिमालयन शेर्पा उपाधि नजिक पुगेको हो । हिमालयन शेर्पाका लागि क्रिस्टन तुतुम्बा, विश्वास श्रेष्ठ र विशन गुरुङले गोल गरे । रोलिङ्गका लागि डेडी बम्बाले गोल फर्काएका थिए ।

१७ औं मिनेटमा क्रिस्टनको गोलबाट अग्रता लिएको हिमालयन शेर्पाले पहिलो हाफमा १–० को अग्रता बनाएको थियो । दोस्रो हाफमा दुई मिनेटको फरकमा २ गोल गर्दै हिमालयनले खेलमा आफ्नो स्थितिलाई थप मजबुद बनाएको थियो । विश्वासले ५० औं र विशनले ५२ औं मिनेटमा गोल गरेका थिए । ५७ औं मिनेटमा बम्बाले फर्काएको गोल सान्त्वनामा सिमित रह्यो ।

हिमालयन शेर्पाका त्रिदेव गुरुङ म्यान अफ दी म्याच घोषित भए र उनले ५ हजार ५ सय रुपैयाँ प्राप्त गरे । उनलाई बेलबारी नगरपालिकाका प्रमुख शिवप्रसाद ढकालले पुरस्कृत गरे । प्रतियोगिताको दोस्रो सेमिफाइमा मंगलबार अर्को ए डिभिजन क्लब नेपाल एपिएफ क्लब र रारा फुटबल क्लब राजारानीबीच प्रतिस्पर्धा हुनेछ ।

टुबोर्ग प्रायोजक रहेको प्रतियोगिताको मुख्य सहयोगमा बेलबारी नगरपालिका, सह प्रायोजकमा लक्ष्मी सामुदायिक वन, बेलबारी नगरपालिकाका सबै वडा, सहयोगीमा मल्टीमिशन ट्रेनिङ सेन्टर धरान तथा प्राविधिक सहयोग मोरङ जिल्ला फुटबल संघ रहेको छ ।

कात्तिक १७ गते हुने प्रतियोगिताको फाइनलको विजेताले उपाधिसहित ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ । त्यस्तै प्रतियोगिताको सर्वोत्कृष्ट खेलाडीले ३१ हजार, सर्वाधिक गोलकर्ताले २१ हजार, विधागत उत्कृष्ट खेलाडीले समान ११ हजार तथा हरेक खेलको म्यान अफ दी म्याचले ५ हजार ५ सय रुपैयाँ प्राप्त गर्ने आयोजक क्लबले जनाएको छ ।