बेलबारी (हाम्रो खेलकुद) – रारा फुटबल क्लब राजारानी चौथो अन्तर्राष्ट्रिय आमन्त्रण बेलबारी गोल्ड कप फुटबल प्रतियोगिताको सेमिफाइनलमा पुगेको छ । मोरङको लक्ष्मीमार्गमा जारी प्रतियोगितामा आइतबार भएको चौथो क्वाटरफाइनलमा रारा फुटबल क्लबले घरेलु टोली डागीहाट युथ क्लब लक्ष्मीमार्ग मोरङलाई २-१ गोल अन्तरले पराजित गर्दै सेमिफाइनलमा स्थान बनाएको हो ।

रारा फुटबल क्लबको जितमा ग्लोरी र योगेश गुरुङले गोल गरेका गरे । खेलको दशौं मिनेटमा ग्लोरीले गोल गर्दै रारा फुटबल क्लबलाई अग्रता दिएका थिए । घरेलु टोली डागिहाट युथ क्लबका सन्तोष न्यौपाउनेले ३० औं मिनेटमा गोल फर्काउँदै खेल बराबरीमा पुर्याएका थिए । पहिलो हाफ १-१ को बराबरीमा सकिएको थियो । दोस्रो हाफको अन्त्य तिर ८१ औं मिनेटमा योगेशले गोल गर्दै रारालाई जित दिलाएका थिए ।

खेलको प्लेयर अफ द म्याच राजारानीका बुद्ध चेमजोङ्ग चुनिए । ८ टोलीको सहभागितामा जारी प्रतियोगितामा ३ ए डिभिजन टोलीले प्रतिस्पर्धा गरिरहेका छन् । ए डिभिजन लिगको तयारीमा रहेका टोलीमध्ये हिमालयन र शुक्रबार अर्को टोली एपिएफ पनि बेलबारी गोल्डकपको सेमिफाइनलमा पुगेको थियो । अर्को ए डिभिजन टोली च्यासल युथ क्लब भने पहिलो खेलमै पराजित भएको थियो । पहिलो सेमिफाइनलमा सोमबार हिमालयन शेर्पाले रोलिङ्ग क्लब धुलाबारी झापाबीच प्रतिस्पर्धा हुनेछ ।

प्रतियोगिताको फाइनलको विजेताले उपाधिसहित ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ । त्यस्तै प्रतियोगिताको सर्वोत्कृष्ट खेलाडीले ३१ हजार, सर्वाधिक गोलकर्ताले २१ हजार, विधागत उत्कृष्ट खेलाडीले समान ११ हजार तथा हरेक खेलको म्यान अफ दी म्याचले ५ हजार ५ सय रुपैयाँ प्राप्त गर्ने आयोजक क्लबले जनाएको छ । फाइनल कात्तिक १७ मा हुनेछ ।