एजेन्सी – इंग्लिस प्रिमियर लिगमा लन्डन क्लब आर्सनलले जित निकाल्दा लिभरपुल बराबरीमा रोकिएको छ । आर्सनलले घरेलु टोली लेस्टर सिटीलाई २–० ले पराजित गरेको हो ।

किङ पावर स्टेडियममा शनिबार राति भएको खेलमा आर्सनलको जितमा गाब्रियल र इमिल स्मिथ रोवीले गोल गरे । दुवै गोल पहिलो हाफमा सम्भव भएको थियो । खेलको पाँचौ मिनेटम नै बुकायो साकाको पासमा गाब्रियलले गोल गर्दै आर्सनललाई १–० को अग्रता दिलाए ।

१८औं मिनेटमा इमिल स्मिथ रोवीले गोल गर्दै आर्सनलको अग्रता दोब्बर पारे । त्यसपछि दुवै टोलीबाट गोल निस्कन नसक्दा आर्सनल विजयी हुन सफल भयो । जितपछि आर्सनल १० खेलबाट १७ अंक जोडेर सातौ स्थानमा उक्लिएको छ । पराजित लेस्टर १४ अंक जोडेर नवौं स्थानमा रहेको छ ।

अर्काे खेलमा दुई गोलको अग्रता जोगाउन नसक्दा लिभरपुल घरेलु मैदानमा ब्राइटनसँग २–२ गोलको बराबरीमा रोकिएको छ । एनफिल्डमा लिभरपुलका जोर्डन हेन्डरसन र साडियो मानेले गोल गर्दा ब्राइटनका इनक विपु र लियान्द्रो ट्रोससार्डले बराबरी गोल फर्काए ।

खेलको चौथो मिनेटमा नै मोहम्मद सलाहको पासमा जोर्डन हेन्डरसनले गोल गर्दै लिभरपुललाई १–० को अग्रता दिलाए । २४औं मिनेटमा साडियो मानेले गोल गर्दै लिभरपुलको अग्रता दोब्बर पारे । ३३औं मिनेटमा साडियो मानेले गोल गरेपनि भिएआरबाट मान्यता पाएन । ४१औं मिनेटमा इनक विपुले गोल गर्दै ब्राइटनलाई खेलमा २–१ को अवस्थामा ल्याए । ६५औं मिनेटमा लियान्द्रो ट्रोससार्डले गोल गर्दै खेललाई २–२ गोलको बराबरीमा ल्याए ।

बराबरीपछि लिभरपुल दोस्रो स्थानमा यथावत रहेको छ । लिभरपुल शीर्षस्थानको चेल्सीसँग ३ अंकले पछि परेको छ । लिभरपुलको २२ तथा चेल्सीको २५ अंक छ । ब्राइटन १६ अंक जोडेर सातौ स्थानमा रहेको छ ।

अन्य नतिजा

बर्नलेविरुद्ध ब्रेन्टफर्ड (३–१), म्यानचेस्टर सिटीविरुद्ध क्रिस्टल प्यालेस (०–२), न्युक्यासलविरुद्ध चेल्सी (०–३), वाट्फोर्डविरुद्ध साउथह्याम्टन (०–१) र टोटेनहमविरुद्ध म्यानचेस्टर युनाइटेड (०–३)