बेलबारी (हाम्रो खेलकुद)– सहिद स्मारक ए डिभिजन टोली हिमालयन शेर्पा चौथो अन्तर्राष्ट्रिय आमन्त्रण बेलबारी गोल्ड कप फुटबल प्रतियोगिताको सेमिफाइनलमा पुगेको छ । मोरङको लक्ष्मीमार्गमा जारी प्रतियोगितामा शनिबार उदपुरको गाइघाट फुटबल क्लबलाई ३–० ले हराउँदै हिमायन शेर्पा अन्तिम चारमा पुगेको हो ।

हिमालयन शेर्पालाई जित दिलाउनका लागि मनीष थापा, सेबी गुरुङ र विश्वास श्रेष्ठले गोल गरे । १९ औं मिनेटमा मनीषको गोलबाट हिमालयन शेर्पाले अग्रता लिएको थियो । गाइघाटविरुद्ध सेबीले ५५ औं र विश्वासले ७१ औं मिनेटमा गोल गर्दै टोलीको जित पक्का गरे । विजेता टोलीका विशन गुरुङ खेलको म्यान अफ दी म्याच घोषित भए र उनले ५ हजार ५ सय रुपैयाँ प्राप्त गरे । बेलबारी नगरपालिकाका प्रवक्ता योगेन्द्र सुवेदीले विशनलाई पुरस्कृत गरे ।

८ टोलीको सहभागितामा जारी प्रतियोगितामा ३ ए डिभिजन टोलीले प्रतिस्पर्धा गरिरहेका छन् । ए डिभिजन लिगको तयारीमा रहेका टोलीमध्ये हिमालयन र शुक्रबार अर्को टोली एपिएफ पनि बेलबारी गोल्डकपको सेमिफाइनलमा पुगेको छ । अर्को ए डिभिजन टोली च्यासल युथ क्लब भने पहिलो खेलमै पराजित भएको थियो । प्रतियोगितामा आइतबार घरेलु टोली डागीहाट युथ क्लबले राजारानीको रारा फुटबल क्लबको सामना गर्नेछ ।