काठमाडौं (हाम्रो खेलकुद)– नेपालले एएफसी सोलिडारिटी कपको फाइनलमा मकाउविरुद्ध उत्रदा टोलीमा धेरै परिवर्तन गर्ने सम्भावना कम छ ।

पछिल्ला तीन खेलमा लगातार सफलता प्राप्त गरेको नेपालले धेरै परिवर्तन गरेको छैन । लाओसविरुद्धको सेमिफाइनलमा २–२ को बराबरीपछि नेपाल टाइब्रेकरमा ३–० ले विजयी भएको थियो । फाइनलमा सेमिफाइनलका नायक रहेका गोलकिपर किरण चेम्जोङसँगै रक्षापक्तिमा कप्तान विराज महर्जन, रविन श्रेष्ठ, अनन्त तामाङ र आदित्य चौधरी यथावत रहनेछन् ।

मिडफिल्डमा सुजल श्रेष्ठ, विमल घर्तीमगर, विक्रम लामा खेल्ने निश्चित छ । एउटा ठाँउमा अन्जन विष्ट वा हेमन गुरुङमध्ये एक खेल्न सक्छन् । फरवार्डमा नवयुग श्रेष्ठ र भरत खवासकै निरन्तरता हुनेछ । पहिलो खेलमा भरत बेन्चमा थिए भने अन्जन र हेमन दुवै खेलेका थिए । दोस्रोमा भरत पहिलो रोजाइमा परेका थिए भने अन्जनलाई आराम दिइएको थियो ।

सेमिफाइनलमा भरत र अन्जन दुवै खेलेपछि हेमनलाई बेन्चमा राखिएको थियो । पहिलो रोजाइमा यीनै तीन खेलाडीबाहेक अन्य भने यथावत छन् । फाइनलमा पनि अन्जन र हेमनमध्ये एक र बाँकी खेलाडी यथावत रहने सम्भावना छ ।

मकाउविरुद्ध नेपालको सम्भावित ११:

किरण चेम्जोङ (गोलकिपर)

विराज महर्जन( कप्तान), रविन श्रेष्ठ, अनन्त तामाङ, आदित्य चौधरी

सुजल श्रेष्ठ, विक्रम लामा, विमल घर्तीमगर, अन्जन विष्ट (हेमन गुरुङ)

भरत खवास, नवयुग श्रेष्ठ