काठमाडौं (हाम्रो खेलकुद) – कतार एअरवेज सहिद स्मारक ए डिभिजन लिग २०७८ को उद्घाटन खेलमा फ्रेन्ड्स क्लब र सातदोबाटो युवा क्लब भिड्ने भएका छन् । पहिलो खेल दशरथ रंगशालामा कार्तिक २९ गते साँझ ५ बजे हुनेछ ।

पहिलो चरणका अन्य खेल दशरथ रंगशाला र एन्फा दुवै मैदानमा हुनेछ । दिउँसो १२ बजेको खेल एन्फा कम्प्लेक्समा हुनेछ भने दिउँसो ३ बजेको खेल दशरथ रंगशालामा हुनेछ । लिगको तेस्रो चरणपछिका खेल भने च्यासलस्थित टेक्निकल सेन्टर र मनाङका केही खेल पोखरा रंगशालामा खेल्ने सम्भावना पनि रहेको लिग निर्देशक संजिव मिश्रले जानकारी दिए ।

पहिलो चरणमा दोस्रो दिन कार्तिक ३० गते हिमालयन शेर्पा विरुद्ध संकटा एन्फामा खेल्दा थ्री स्टार क्लबले दशरथ रंगशालामा च्यासलको सामना गर्नेछ । तेस्रो दिन मङ्सिर १ गते एन्फामा जावलाखेल र मनाङ खेल्दा रंगशालामा ब्रिगेड ब्वाइज क्लब र एपीएफ खेल्नेछन् । चौथो दिन मङ्सिर २ गते त्रिभुवन आर्मी क्लब र नेपाल पुलिस क्लब एन्फामा खेल्दा दशरथ रंगशालामा मच्छिन्द्र र न्यु रोड टिम (एनआरटी) खेल्नेछन् । एन्फामा हुने खेल दिउँसो १२ बजे तथा रंगशालामा दिउँसो ३ बजे हुनेछन् ।

एन्फाले हाललाई सुरुवाती २ चरणको मात्र खेल तालिका सार्वजनिक गरेको छ । त्यसपछि कसले कुन टोलीसँग खेल्ने पक्का भएपनि मिति भने पछि मात्र तोकिनेछ ।

लिग फागुन दोस्रो सातासम्म चल्नेछ । सिंगल राउन्डको लिगको विजेताले उपाधि जित्नेछ । लिगमा कुल १३ चरण र ९१ खेल हुनेछ । यसअघि सुपर ८ खेल्ने अवधारणा रहेपनि त्यो लागु नहुने भएको छ । यसपटक पुछारका दुई टोली रेलिगेसनमा पर्नेछन् । लिग विजेता टोलीले ७५ लाख, उपविजेताले ५० लाख तथा २५ लाख रुपैयाँ प्राप्त गर्नेछन् ।

प्रतियोगिताको उत्कृष्ट खेलाडीले गोल्डेन बल प्राप्त गर्दा सर्वाधिक गोलकर्ताले गोल्डेन बुट तथा उत्कृष्ट गोलरक्षकले गोल्डेन ग्लोभ्स प्राप्त गर्नेछन् । यी खेलाडीसँगै उदियमान खेलाडीले नगद पुरस्कार पनि प्राप्त गर्नेछन् ।

पहिलो चरणका खेल :

कार्तिक २९ गते – फ्रेन्ड्स विरुद्ध सातदोबाटो – साँझ ५ बजे – दशरथ रंगशाला

कार्तिक ३० गते – हिमालयन शेर्पा विरुद्ध संकटा – दिउँसो १२ बजे – एन्फा कम्प्लेक्स

कार्तिक ३० गते – थ्री स्टार क्लब विरुद्ध च्यासल – दिउँसो ३ बजे – दशरथ रंगशालामा

मङ्सिर १ गते – जावलाखेल विरुद्ध मनाङ – दिउँसो १२ बजे – एन्फा

मङ्सिर १ गते – ब्रिगेड ब्वाइज क्लब र एपीएफ – दिउँसो ३ बजे दशरथ रंगशालामा

मङ्सिर २ गते – त्रिभुवन आर्मी क्लब विरुद्ध नेपाल पुलिस क्लब – दिउँसो १२ बजे – एन्फा

मङ्सिर २ गते – मच्छिन्द्र विरुद्ध न्यु रोड टिम (एनआरटी) -दिउँसो ३ बजे – दशरथ रंगशालामा