काठमाडौं (हाम्रो खेलकुद) – ए डिभिजन लिगको तयारीस्वरूप खेलिएको मैत्रीपूर्ण खेलमा थ्री स्टार क्लब र न्यु रोड टिम (एनआरटी) ले बराबरी खेलेका छन् । एनआरटीले एकेडेमी संचालन गर्ने कीर्तिपुरस्थित ल्याब स्कुलको मैदानमा भएको निकै प्रतिस्पर्धात्मक खेलमा थ्री स्टार ३-३ को बराबरीमा रोकिएको हो ।

थ्री स्टारको लागि डोना थापा, निकोलस फर्नान्डेस र राफाएल रिम्गागोले गोल गर्दा एनआरटीका स्टेफान बिनोङ समिरले २ तथा मेसुके ओलोमोउले १ गोल गरे । एनआरटीले खेलमा दुई पटक बराबरी गोल फर्काएको थियो । डोना थापाको पेनाल्टीमा थ्री स्टारले सुरुवाती अग्रता लिएपनि बिनोङले पहिलो हाफमा नै गोल फर्काए । गोलरक्षक प्रिसो र कप्तान विक्रम लामाबीच समन्वय हुन नसकेको फाइदा उठाउँदै उनले पेनाल्टी क्षेत्र बाहिरबाट गोल गरेका थिए ।

दोस्रो हाफमा फर्नान्डेसले फ्रिकिकमा गोल गर्दै थ्री स्टारलाई अग्रता दिलाए । उनले पेनाल्टी क्षेत्र बाहिरबाट गरेको फ्रिकिक प्रहार गोलरक्षक पुजन होनाको हातमा लाग्दै गोल भएको थियो । त्यसको केहीबेरमा नै एनआरटीले बराबरी गोल फर्कायो । थ्री स्टारको कर्नर मुभ असफल भएपछि अघि बढेको काउन्टरमा बिनोङले सहजै पेनाल्टी क्षेत्रभित्र फिनिस गरेका थिए । मेसुकेले गोल गर्दै एनआरटीलाई अग्रता दिलाए । अन्तिम समयमा पेनाल्टी क्षेत्रभित्र डिफेन्डरबाट ह्यान्ड भएपछि प्राप्त पेनाल्टीलाई राफाएलले गोल गर्दै थ्री स्टारलाई बराबरीमा पुर्याए ।

दुवै टोलीले ए डिभिजनका लागि टोली निर्माण गरिरहेका छन् । आजको खेलमा दुवै टोलीले थुप्रै नयाँ खेलाडी प्रयोग गरेका थिए । एनआरटीमा राजुकाजी शाक्य र जीवन सिन्केमान प्रशिक्षण टोलीमा छन् । यता थ्री स्टारले उज्जन श्रेष्ठलाई जिम्मेवारी दिएको छ । दुवै टोलीमा राष्ट्रिय टोली तथा यू-२३ टोलीका खेलाडी थपिन बाँकी छन् ।

खेलको थप तस्बिरहरु हेर्न यहाँ थिच्नुहोस

नोट : यसअघि बराबरी हुनुपर्नेमा अन्यथा हुन गएकोमा सच्याइएको छ