एजेन्सी – क्याटलान क्लब बार्सिलोनाले सेर्जी बार्जुआनलाई अन्तरिम प्रशिक्षकमा नियुक्त गरेको छ । मुख्य प्रशिक्षक रोनाल्ड कोम्यानलाई बर्खास्त गरेको एक दिनपछि बार्सिलोनाले बिहीबार बार्सिलोनाकै ‘बी’ टिमको मुख्य प्रशिक्षक रहेका सेर्जीलाई अन्तरिम प्रशिक्षकमा नियुक्त गरेको हो ।

४९ वर्षीय प्रशिक्षक सेर्जीको नेतृत्वमा टोलीले प्रशिक्षण सुरु गरिसकेको समेत बार्सिलोनाले जनाएको छ । लगातारको खराव प्रदर्शन तथा बुधबार राति रायो भालेकानोसँग १–० ले पराजित भएपछि बार्सिलोनाले डच प्रशिक्षक कोम्यानलाई बर्खास्त गरेको थियो ।

उनी १४ महिना पछि नै बर्खास्तीमा परेका थिए । ५८ वर्षीय कोम्यान २०२० को अगस्टमा बार्सिलोनाका मुख्य प्रशिक्षक चयन भएका थिए। ला लिगामा बार्सिलोना १० खेलबाट १५ अंक जोडेर नवौं स्थानमा रहेको छ । बार्सिलोना शीर्षस्थानको रियल सोसिडाडभन्दा ९ अंकले पछि छ ।

बार्सिलोनाले मुख्य प्रशिक्षक नियुक्त नगरेसम्म उनले नै टोलीको प्रशिक्षण सम्हाल्नेछन् । बार्सिलोनाले क्लबका पुर्व खेलाडी जाभी हर्नान्डेजलाई मुख्य प्रशिक्षक बनाउने तयारी गरिरहेको छ । बार्सिलोनाले कतारी क्लब अल साद र जाभीसँग कुराकानी गरिरहेको छ । सेर्जीको नेतृत्वमा बार्सिलोनाले शनिबार घरेलु मैदानमा एलाभेससँग खेल्नेछ ।

सेर्जीले बार्सिलोनामा खेलाडीको रुपमा ३८६ खेल खेल्दा विभिन्न ९ उपाधि जितेका छन् । सेर्जी गत समरमा बार्सिलोनाको ‘बी’ टोलीको मुख्य प्रशिक्षक बनेका थिए । उनको प्रशिक्षणमा बार्सिलोनाको ‘बी’ टोली तीन जित, चार बराबरी र २ हारसहित १ अंक जोडेर ११औं स्थानमा रहेको छ ।