एजेन्सी – इन्ज्युरी समयमा सम्हालिन नसक्दा युभेन्ट्सले इटालियन सिरी ‘ए’ मा घरेलु मैदानमा सस्सुलोसँग स्तब्ध बनेको छ । युभेन्ट्स सस्सुलोसँग २–१ ले स्तब्ध बनेको हो ।

एलिएन्ज एरिना टुरिनमा बुधबार राति भएको खेलमा घरेलु टोलीलाई स्तब्ध पार्न डाभिड फ्राटटेसी र म्याक्सिमी लोपेजले गोल गरे । घरेलु टोलीका वेस्टन म्याकिनीले एक गोल गरे । प्रतिस्पर्धात्मक खेलको ४४औं मिनेटमा डोभिड फ्राटटेसीको गोलबाट सस्सुलोले अग्रता लिएको थियो । उनले ग्रिगोइरे डेफ्रेलको पासमा गोल गरेका थिए ।

७६औं मिनेटमा वेस्टन म्याकिन्नीले गोल गर्दै खेललाई १–१ गोलको बराबरीमा ल्याए । उनले पाउलो डिबालाको पासमा गोल गरेका थिए । इन्ज्युरी समयको थप गरिएको पाँचौ मिनेटमा म्याक्सिमि लोपेजले गोल गर्दै युभेन्ट्सलाई २–१ को हार चखाए । उनले डोमिनिको बेरारडीको पासमा गोल गरेका थिए ।

सिरी ‘ए’ मा युभेन्ट्सको यो तेस्रो हार हो । हारपछि युभेन्ट्स १० खेलबाट १५ अंक जोडेर सातौ स्थानमा रहँदा जित निकालेको सस्सुलो १४ अंक जोडेर नवौं स्थानमा उक्लिएको छ ।

अर्काे खेलमा इन्टर मिलानले १० खेलाडीमा समेटिएको इम्पोलीलाई २–० ले पराजित गरेको छ । इन्टरको जितमा ड्यानिलो डि एम्ब्रुसो र फेडरिको डिमार्काेले गोल गरे ।

३४औं मिनेटमा ड्यानिलो डि एम्ब्रुसोले एलेक्सिस सान्चेजको पासमा गोल गर्दै इन्टरलाई १–० को अग्रता दिलाए । ५२औं मिनेटमा सामुइल रिक्सी सिधै रातो कार्ड खाँदै मैदानबाट बाहिरिएपछि घरेलु टोली इम्पोली दवावमा परेको थियो । ६६औं मिनेटमा फेडरिको डिमार्काेले लोउटारो मार्टिनेजले गोल गर्दै इन्टरलाई २–० को जित दिलाए ।

जितपछि इन्टर मिलान १० खेलबाट २१ अंक जोडेर तेस्रो स्थानमा यथावत रहेको छ । पराजित इम्पोली १२ अंक जोडेर १२औं स्थानमा रहेको छ ।

अन्य नतिजा
उडिनेसविरुद्ध हेलास भेरोना (१–१), साम्पडोरियाविरुद्ध एटलान्टा (१–३), क्याग्लिएरीविरुद्ध रोमा (१–२) र लाजियोविरुद्ध फियोरेन्टिना (१–०)