काठमाडौं (हाम्रो खेलकुद) – झापा भेट्रान्स फुटबल क्लब र पोखरा भेट्रान्सले मेयर कप भेट्रान्स फुटबल प्रतियोगितामा सानदार जित दर्ता गरेको छ ।

त्रिपुरेश्वरस्थित दशरथ रंगशालामा मंगलबार भएको खेलमा झापाले विजय युथ हेटौडालाई ५–१ को फराकिलो अन्तरले पराजित गर्दै विजयी सुरुवात गरेको हो । झापाको जितमा नरेन्द्र मणी लिम्बुले ४ तथा श्याम कुमार गोलेले एक गोल थपे । हेटौडाका कृष्ण शाक्यले एक गोल फर्काए । यस जितसँगै समूह ‘ई’ मा झापाले ३ अंक जोडेको छ । पहिलो हार बेहोरेको हेटौडाको ३ अंक छ । हेटौडाले पहिलो खेलमा काभ्रे भेट्रान्सलाई हराएको थियो ।

अर्काे खेलमा साइनिङ सन फुटबल एकेडेमीले ललितपुर वार्ड नम्बर १४ लाई २–० ले पराजित गरेको छ । साइनिङको जितमा उमेश लामा र राजु दंगालले एक एक गोल गरे ।

अर्काे खेलमा पोखरा भेट्रान्सले श्री कुमारी भेट्रान्सलाई ७–० ले पराजित गरेको छ । पोखराको जितमा विजय गुरुङ र मनोज गुरुङले ह्याट्रिक पुरा गर्दा सन्जय गुरुङले एक गोल थपे ।

प्रतियोगितामा विजेता टोलीले ५ लाख तथा दोस्रो हुने टोलीले २ लाख ५० हजार रुपैयाँ प्राप्त गर्नेछ । प्रतियोगिता त्रिपुरेश्वरस्थित दशरथ रंगशाला र लगनखेलमा रहेको आर्मीको खेल मैदानमा हुनेछ । प्रतियोगिता कात्तिक १६ गते सम्म चल्नेछ । प्रतियोगिताका सहभागी २१ टोलीलाई ७ समूहमा विभाजन गरिएको छ । हरेक समूहको शीर्ष टोलीसँगै ७ समूहको उपविजेतामध्ये एक उत्कृष्ट टोली क्वाटरफाइनलमा पुग्नेछन् । प्रतियोगितामा ४० वर्षमाथिको खेलाडी हुनुपर्नेछ । ३ जना ३५ वर्षमाथिको खेलाडी राख्न पाउने प्रावधान आयोजकले तय गरेको छ ।