काठमाडौं (हाम्रो खेलकुद)– दक्षिण एसियाली खेलकुदका स्वर्णधारी मिडफिल्डर हेमन्त थापा मगर रुस्लान थ्री स्टार क्लबमा आबद्ध भएका छन् । यसै महिनाको अन्त्यमा सुरु हुने सहिद स्मारक ए डिभिजन लिग अघि हेमन्तले थ्री स्टारसँग सम्झौता गरेका हुन् ।

थ्री स्टारले हेमन्तसँग दुई वर्षको सम्झौता भएको जनाएको छ । एन्फा एकेडेमीका उत्पादन समेत रहेका उनले नेपाली यू १३, १४, १६ र २३ बाट प्रतिनिधित्व गरिसकेका छन् । उनले यू-१४ र यू-१६ उमेर समुहमा कप्तानी समेत गरेका थिए । उनी सन् २०१९ को १३ औं सागमा स्वर्ण पदक जित्दा फुटबल टोलीका सदस्य थिए ।

कात्तिक २९ गतेबाट सुरु हुने लिगका लागि क्लबहरुले खेलाडी अनुबन्धनलाई तीब्रता दिएका छन् । लिगमा १४ टोलीको सहभागिता रहनेछ । आइतबार नै राष्ट्रिय फुटबल खेलाडी विमल घर्तीमगर लिगको साविक विजेता क्लब मछिन्द्र क्लबसँग सम्झौता गरेका छन् ।

नयाँ सिजनका लागि थ्री स्टारले यसअघि कप्तान विक्रम लामा, उपकप्तान अनन्त तामाङ, सन्जोक राई, निशान खड्का, मनग्य नकर्मी, सुसान श्रेष्ठ, मिक्चेन तामाङ, निशान खड्का र गोलरक्षक प्रिसोको सम्झौता नविकरण गर्दा नयाँ खेलाडीको रुपमा डोना थापा, आयुष घलान, राफयल रिमगागो, गोलरक्षक रोशन गुरुङ र मिडफिल्डर लाकेन लिम्बुलाई अनुबन्ध गरिसकेको छ ।