एजेन्सी – खेलमा दुईपटक लिएको अग्रता जोगाउन नसक्दा एभर्टनले इंग्लिस प्रिमियर लिगमा घरेलु मैदानमा वाट्फोर्डसँग लज्जास्पद हार बेहोरेको छ ।

एभर्टनले घरेलु मैदानमा वाट्फोर्डसँग ५–२ को लज्जास्पद हार बेहोरेको हो । वाट्फोर्डको जितमा जोसुवा किङले ह्याट्रिक पुरा गर्दा जुराज कुका र इमानुयल डेनिसले समान एक गोल गरे । वाट्फोर्डका टोम डाभिस र रिचार्लीसनको गोल सान्त्वना बन्यो ।

गुडिसन पार्कमा शनिबार राति भएको खेलमा घरेलु टोली एभर्टनले खेलको तेस्रो मिनेटमा नै टोम डाभिसको गोलबाट अग्रता लिएको थियो । उनले डेमाराईको पासमा गोल गरेका थिए । १३औं मिनेटमा जोसुवा किङले गोल गर्दै खेललाई १–१ गोलको बराबरीमा ल्याए ।

६३औं मिनेटमा रिचार्लीसनले गोल गर्दै एभर्टनलाई पुनः २–१ को अग्रता दिलाए । उनले मैदान छिरेको तेस्रो मिनेटमा नै माइकल किनको पासमा गोल गर्न सफल भएका थिए । त्यसपछि भने एभर्टनको लय बिग्रिन पुगेको थियो ।

७८औं मिनेटमा जुराज कुकाले जुआन हर्नान्डेजको पासमा गोल गर्दै खेललाई २–२ गोलको बराबरीमा ल्याए । ८०औं मिनेटमा जोसुवा किङले व्यक्तिगत दोस्रो तथा टोलीका लागि तेस्रो गोल गरेपछि वाट्फोर्डले खेलमा ३–२ को अग्रता लिन सफल भयो ।

८७औं मिनेटमा जोसुवा किङले ह्याट्रिक पुरा गरेपछि वाट्फोर्डले खेलमा ४–२ को आरामदायी पकड बनायो । इन्ज्युरी समयको थप गरिएको पहिलो मिनेटमा इमानुयल डेनिसले गोल गर्दै वाट्फोर्डलाई ५–२ को सानदार जित दिलाए ।

यो जितपछि वाट्फोर्ड ९ खेलबाट १० अंक जोडेर १४औं स्थानमा उक्लिएको छ । पराजित एभर्टन १४ अंक जोडेर आठौं स्थानमा रहेको छ ।