एजेन्सी – जर्मन बुन्डेसलिगाको शीर्ष दौडमा रहेको बायर्न म्युनिख र बोरुसिया डर्टमुन्डले फराकिलो जित निकालेको छ । घरेलु मैदानमा बायर्नले होफेनहाइनमाथि ४–० को सानदार जित निकालेको हो ।

बायर्नको फराकिलो जितमा सर्ज जिनाब्री, रोबर्ट लेवान्डोस्की, इरिक म्याक्सिम चुपो मोटिङ र किङ्सले कोमानले समान एक गोल गरे । एलिएन्ज एरिना म्युनिखमा शनिबार राति भएको खेलको आठौं मिनेटमा सर्ज जिनाब्रीले गोल गरेपनि उनको गोलले मान्यता पाएन ।

१६औं मिनेटमा जिनाब्रीले गोल गर्दै बायर्नलाई अग्रता दिलाए । उनले जमल मुसिएलाको पासमा गोल गरेका थिए । ३०औं मिनेटमा रोबर्ट लेवान्डोस्कीले थोमस मुलरको पासमा गोल गर्दै बायर्नको अग्रता दोब्बर पारे । ८२औं मिनेटमा वैकल्पिक खेलाडी इरिक म्याक्सिम चुपो मोटिङले गोल गर्दै बायर्नलाई सहज जिततर्फ अघि बढाए ।

इरिक ६५औं मिनेटमा थोमस मुलरको स्थानमा मैदान छिरेका थिए । निर्धारित समयको खेल सकिन तीन मिनेट बाँकी रहँदा किङ्सले कोमानले गोल गर्दै बायर्नलाई ४–० को सहज जित दिलाए । जितपछि बायर्न ९ खेलबाट २२ अंक जोडेर शीर्षस्थानमा यथावत रहेको छ । पराजित होफेनआइन ११ अंक जोडेर १०औं स्थानमा रहेको छ ।

अर्काे खेलमा शीर्षस्थानमा बायर्नलाई पछ्याइरहेको बोरुसिया डर्टमुन्डले अर्मेनिया बिलेफिल्डलाई ३–१ ले पराजित गरेको छ । डर्टमुन्डको जितमा इम्री क्यान, म्याट हमेल्स र जुडे बेलिङघमले गोल गरे । अर्मेनिया बिलेफिल्डका फावियन क्लोसले एक गोल गरे ।

जितपछि डर्टमुन्ड ९ खेलबाट २१ अंक जोडेर दोस्रो स्थानमा रहेको छ । पराजित बिलेफिल्ड ५ अंक जोडेर १७औं स्थानमा रहेको छ ।