काठमाडौं (हाम्रो खेलकुद) – राष्ट्रिय टोलीकी सदस्य रश्मी कुमारी घिसिङ एक्लैको चार गोल मद्दत बागमती नगरपालिकाले उपमेयर कप राष्ट्रिय महिला लिग छनोट प्रतियोगितामा लगातार दोस्रो जित दर्ता गरेको छ ।

सातदोबाटोस्थित एन्फा कम्प्लेक्समा शनिबार गोदावरी नगरपालिकालाई ७–० को फराकिलो अन्तरले पराजित गर्दै बागमतीले लगातार दोस्रो जित निकालेको हो । गीता राना, सदिपा ब्लोन र अनु राईले समान एक गोल गरिन् । यसअघि बागमतीले पहिलो खेलमा महालक्ष्मी नगरपालिकालाई ९–० गोल अन्तरले हराएको थियो ।

यस्तै अर्काे खेलमा ललितपुर महानगरपालिकाले कागेश्वारी नगरपालिकालाई १०–० को भारी अन्तरले पराजित गर्दै विजयी सुरुवात गरेको छ । ललितपुरको जितमा निर्मला बिकले ह्याट्रिकसहित चार गोल गर्दा सम्झना लावतीले ह्याट्रिक पूरा गरिन् । मनिषा राउतले दुई गोल गरिन् । एक गोल उपहार पाएको थियो ।

छनोटमा मा ३१ टोलीले प्रतिस्पर्धा गरिरहेका छन् । सहभागी टोलीलाई १० समूहमा विभाजन गरिएको छ । प्रतियोगिताको विजेता र उपविजेता टोली महिला राष्ट्रिय लिगमा छनोट हुनेछन् । प्रतियोगिताको विजेताले ५ लाख रुपैयाँ प्राप्त गर्नेछन् ।

दोस्रो हुने टोलीले ३ लाख तथा फेयर प्ले टिमले ५० हजार प्राप्त गर्नेछन् । प्रतियोगिताको सर्वोकृष्ट खेलाडीले ५० हजार र विधागततर्फ उत्कृष्ट हुनेले समान २०–२० हजार पाउनेछन् ।