काठमाडौं (हाम्रो खेलकुद) – ललितपुरको रुस्लान थ्री स्टार क्बबले गोलरक्षक प्रिसोसँगको सम्झौता नवीकरण गरेको छ । थ्री स्टारले शुक्रबार गोलरक्षक प्रिसोसँग सम्झौता नवीकरण गरेको जनाएको छ ।

थ्री स्टारले प्रिसोसँग एक वर्षको लागि सम्झौता नवीकरण गरेको जनाएको छ । थ्री स्टारले आसन्न ‘ए’ डिभिजन लिगलाई लक्षित गर्दै प्रिसोसँगको सम्झौता नवीकरण गरेको हो । गत सिजन प्रिसोले लिगमा उच्च प्रदर्शन गरेपछि थ्री स्टारले उनीसँग सम्झौता लम्ब्याएको हो ।

थ्री स्टारसँगको सम्झौतापछि प्रिसोले उपाधिका लागि लड्ने बताए । ‘थ्री स्टार मेरो हृदयमा छ । यहाँको वातावरण माया, समर्थन र प्रेरणाले भरिएको छ ।’ उनले भने, ‘हामी लिगमा उत्कृष्ट प्रदर्शन गर्नेमा विश्वास गर्दछौं । हामी सबै उपाधि जित्नका लागि कठिन लडाई गर्नेछौ ।’

नयाँ सिजनका लागि थ्री स्टारले यसअघि कप्तान विक्रम लामा, उपकप्तान अनन्त तामाङ, सन्जोक राई, निशान खड्का, मनग्य नकर्मी, सुसान श्रेष्ठ, मिक्चेन तामाङ र निशान खड्काको सम्झौता नविकरण गर्दा नयाँ खेलाडीको रुपमा डोना थापा, आयुष घलान, राफयल रिमगागो, गोलरक्षक रोशन गुरुङ र मिडफिल्डर लाकेन लिम्बुलाई अनुबन्ध गरिसकेको छ ।

यस्तै युवा डिफेन्डर आश्विन भट्टराई, युवा विंगर ऋतिक खड्का र गोलरक्षक अरुण ब्लोनलाई अनुबन्ध गरेको छ । ‘ए’ डिभिजन लिग कात्तिक २९ बाट सुरु हुदैछ । टोलीले लिगलाई लक्षित गर्दै प्रशिक्षण सुरु गरिसकेको छ ।