काठमाडौं (हाम्रो खेलकुद) – बागमती, कन्काई र कालिका नगरपालिकाले उपमेयर कप राष्ट्रिय महिला लिग छनोट प्रतियोगितामा विजयी सुरुवात गरेका छन् ।

एन्फा कम्प्लेक्स सातदोबाटोमा बिहीबार भएको पहिलो खेलमा राष्ट्रिय खेलाडीले भरिएको बागमती नगरपालिकाले महालक्ष्मी नगरपालिकालाई ९–० को फराकिलो गोल अन्तरले पराजित गर्दै विजयी सुरुवात गरेको हो । बागमतीको फराकिलो जितमा राष्ट्रिय टोलीकी सदस्य रश्मी कुमारी घिसिङले ५ गोल गरिन् । राष्ट्रिय टोलीकी कप्तान रेनुका नगरकोटीले २ तथा सदिमा ब्लोन र अनु राईले समान एक गोल गरिन् ।

यस्तै अर्काे खेलमा कन्काई नगरपालिकाले गोदावरी नगरपालिकालाई १२–० को भारी अन्तरले पराजित गरेको छ । कन्काईको जितमा कुसुम खतिवडाले दोहोरो ह्याट्रिक पुरा गरिन् । कप्तान लक्ष्मी श्रेष्ठले ४ तथा मनिका तुमरुक र इमा राईले समान एक गोल गरिन् ।

यस्तै अर्काे खेलमा कालिका नगरपालिकाले कागेश्वरी नगरपालिकालाई १०–० को फराकिलो अन्तरले पराजित गर्दै विजयी सुरुवात गरेको छ । कालिकाको जितमा अनुष्का शेर्पाले ह्याट्रिकसहित ४ गोल गरिन् । सम्झना तामाङ र सबिता राना मगरले समान दुई तथा सुनकला राई र प्रिती राईले समान एक गोल गरिन् ।

छनोटमा मा ३१ टोलीले प्रतिस्पर्धा गरिरहेका छन् । सहभागी टोलीलाई १० समूहमा विभाजन गरिएको छ । प्रतियोगिताको विजेता र उपविजेता टोली महिला राष्ट्रिय लिगमा छनोट हुनेछन् । प्रतियोगिताको विजेताले ५ लाख रुपैयाँ प्राप्त गर्नेछन् ।

दोस्रो हुने टोलीले ३ लाख तथा फेयर प्ले टिमले ५० हजार प्राप्त गर्नेछन् । प्रतियोगिताको सर्वोकृष्ट खेलाडीले ५० हजार र विधागततर्फ उत्कृष्ट हुनेले समान २०-२० हजार पाउने छन् ।