एजेन्सी – युइएफए च्याम्पियन्स लिग अन्तरगत आज राति फ्रेन्च क्लब पेरिस सेन्ट जर्मेन (पीएसजी)ले जर्मन क्लब आरबी लाइप्जिगसँग प्रतिस्पर्धा गर्दैछ ।

खेल पीएसजीको घरेलु मैदानमा नेपाली समयअनुसार राति १२ः४५ बजे हुनेछ । घरेलु मैदानमा लाइप्जिगविरुद्ध उत्रदा पीएसजीसँग आफ्नो स्टार फरवार्ड नेयमार टोलीमा हुनेछैनन् । चोटका कारण नेयमारले जर्मन क्लबविरुद्धको खेल गुमाउने भएका हुन् । नेयमारले विश्वकप छनोट दौरान चोट बोक्न पुगेका थिए । नेयमारले सोमबार घरेलु मैदानमा हुने खेल गुमाउने पुष्टि गरेको छ ।

नेयमार टोलीमा नरहेपनि टोलीसँग युवा स्टार केलियन एमबाप्पे, लियोनेल मेस्सी, जुलियन ड्राक्सलर, एन्जल डि मारिया, मार्काे भेराट्टी, एन्डर हेरेरा, मोउरो इकार्डी, इड्रिसा गाना गुआई, अचरफ हाकिमी, मार्किन्हस, प्रेसनेल किमपेम्वे, नुनो मेन्डेस र गोलरक्षक जियानलुइजी डोन्नरुम्मा रहेका छन् । जर्जिनो वाइनाल्डम, जुआन बर्नाट, डानिलो पेरेइरा, राफिन्हा, एब्डोउ डियालो, थिलो केरहर र कोलिन डग्वा पनि टोलीमा रहेका छन् ।

च्याम्पियन्स लिगमा जित निकाल्न नसकेको लाइप्जिग घरेलु टोलीलाई स्तब्ध पार्दै अंक जोड्ने लक्ष्यमा हुनेछ । टोलीसँग युसुफ पउलसेन, इमिल फोर्सवर्ग, क्रिस्टोफोर एनकुुकु, एन्जेलिनो, केभिन काम्पल, नोरडी मुकिइल र गोलरक्षक पिटर गुलासी रहेका छन् ।

यि दुई टोली तेस्रोपटक भिड्न लागेका हुन् । यि दुई टोलीले गत वर्ष पनि समूह चरणमा प्रतिस्पर्धा गरेका थिए । जुमा दुवै टोलीले समान एक जित निकालेका थिए ।

शीर्षस्थानमा रहेको पीएसजीको दुई खेलबाट ४ अंक छ । समान ४ अंक नै रहेपनि क्लब ब्रुग दोस्रो स्थानमा रहेको छ । ३ अंक जोडेको म्यानचेस्टर सिटी तेस्रो तथा अंकविहीन आरबी लाइप्जिग पुछारमा छ ।

यही समूह ‘ए’ को अर्काे खेलमा क्लब ब्रुग र म्यानचेस्टर सिटीबीच राति १०ः३० बजे प्रतिस्पर्धा हुदैछ ।