एजेन्सी – फिफा विश्वकप कतार २०२२ को युरोपेली छनोटमा इंग्ल्यान्ड बराबरीमा रोकिएको छ । घरेलु मैदानमा इंग्ल्यान्डले हंगेरीसँग १–१ गोलको बराबरी खेलेको छ ।

इंग्ल्यान्डले घरेलु मैदानमा सन् २०१२ पछि बराबरी खेलेको हो । त्यतिबेला युक्रेनसँग बराबरी खेलेको थियो । वेम्वली स्टेडियममा मंगलबार राति भएको खेलमा घरेलु टोली खेलको २४औं मिनेटमा पछि परेको थियो । रोलान्ड सल्लाईले पेनाल्टीमार्फत गोल गर्दै हंगेरीलाई १–० को अग्रता दिलाए ।

३७औं मिनेटमा जोन स्टोन्सले गोल गर्दै खेललाई १–१ गोलको बराबरीमा ल्याए । दोस्रो हाफमा दुवै टोलीबाट गोल निस्कन नसक्दा खेल बराबरीमा सकियो । बराबरीपछि इंग्ल्यान्डलाई विश्वकपमा छनोट हुन अर्काे खेल कुर्नुपर्ने भएको छ । यो बराबरीपछि इंग्ल्यान्ड समूह ‘आई’ मा ८ खेलबाट २० अंक जोडेर शीर्षस्थानमा रहेको छ । दोस्रो स्थानमा रहेको पोल्यान्डको १७ अंक छ ।

यही समूहको अर्काे खेलमा पोल्यान्डले अल्वानियालाई १–० ले पराजित गरेको छ । पोल्यान्डको जितमा कारोल स्वीर्डेस्कीले ७७औं मिनेटमा विजयी गोल गरे ।

यो जितपछि पोल्यान्डले विश्वकपमा छनोट हुने सम्भावना जीवितै राखेको छ । पोल्यान्ड शीर्षस्थानको इंग्ल्यान्डसँग मात्रै ३ अंकले पछि छ । अब समूह चरणमा दुई खेल खेल्न बाँकी छ ।

अर्काे खेलमा एन्डोराले समान मारिनोलाई ३–० ले पराजित गरेको छ । एनडोराको जितमा मार्क पुजोल, सर्जियो मोरेनो र रिकार्ड फर्नान्डेजले गोल गरे । यो नतिजापछि एन्डोराको ६ अंक पुगेको छ । सान मारिनो अंकविहीन हुदै पुछारमा छ ।