एजेन्सी – पोर्चुगिज सुपरस्टार क्रिस्टियानो रोनाल्डोमाथि लागेको बलात्कार मुद्दा रद्द गर्न अदालतले सिफारिस गरेको छ । नेभाडाको संघीय माजेस्ट्रेट न्यायाधिश ड्यानियल अल्बरेग्ट्सले मुद्दा रद्द गर्ने निर्णय लिएसँगै अब रोनाल्डो तनावमुक्त भएका छन् ।

ड्यानियलले रोनाल्डाबाट कुनै अपराध नभएको तथा क्याथरिन मेयोर्गाले सन् २०१० मा गोप्य रुपमा ३ लाख ७५ हजार अमेरिकी डलर लिएर आपराधिक मुद्दा छोडेको तथ्यलाई मध्यनजर गरेको छ । मेयोर्गा र उनको कानुनी टिमलाई त्यसपश्चात रोनोल्डोको वकिल अथवा प्रतिनिधिले धम्कि दिएको वा कानून कार्यान्वयनमा बाधा पुर्याएको कुनै प्रमाण अदालतले फेला नपरेको समेत जनाएको छ ।

न्यायाधिश ड्यानियलले रोनाल्डोको वकिलले मुद्दा रद्द गर्न राखेको मागको पक्ष लिएका हुन् । मुद्दाको सुनुवाई गर्ने न्यायाधिश ड्यानियलले एक सिफारिसमा मेयोर्गाका वकिल लेस्ली मार्क स्टोभलमाथि चुहावट तथा चोरी भएको कागजातको आधारमा मुद्दा लगाएको आरोप लगाए । उक्त कागजात रोनाल्डो र उनका वकिलबीच भएको विशेष अधिकार प्राप्त कुराकानी हो ।

‘मेयोर्गाको वकिलको अनुपयुक्त आचरणका लागि मेयर्गाको मुद्दा खारेजी कठोर परिणाम हो,’ न्यायाधिश ड्यानियलले अमेरिकी डिस्ट्रिक्ट न्यायाधिश जेनिफर डोर्सीलाई दिएको सिफारिसमा लेखे । तर ड्यानियलको सिफारिस डोर्सीले कहिले लिने भन्ने मिति तय भएको छैन । ‘स्टोभलले आफ्ना ग्राहक तथा उनको पेशाप्रति खराब आचरण तथा विश्वास देखाएर काम गरेकी छन्,’ ड्यानियलको निर्णयमा उल्लेख छ ।