काठमाडौं (हाम्रो खेलकुद) – नेपाली राष्ट्रिय फुटबल टोलीले साफ च्याम्पियनसिप २०२१ अन्तर्गत दोस्रो खेलमा श्रीलंकालाई पराजित गर्दा विंगर अन्जन विष्ट प्लेयर अफ द म्याच बने ।

अन्जनसँगै सुमन लामा र आयुष घलानले १-१ गोल गरेपछि नेपाल ३-२ को जित दर्ता गर्न सफल भयो । राष्ट्रिय टोलीबाट अन्जनको यो छैटौं गोल हो । सन् २०१९ मा चाइनिज ताइपेइविरुद्ध २ गोल गर्दै राष्ट्रिय टोलीमा गोलको खाता खोलेका उनले त्यसयता प्रशिक्षक अलमुताइरीको प्रशिक्षणमा ४ गोल गरिसकेका छन् ।

श्रीलंकाविरुद्ध जितपछि बोल्दै उनले प्रशिक्षकको विश्वासका लागि धन्यवाद व्यक्त गरे । ‘म सबै खेलाडी सहकर्मी, प्रशिक्षक र समर्थकलाई धन्यवाद दिन चाहन्छु । मुख्य कुरा प्रशिक्षकले मलाई विश्वास गर्नुभएकोमा आभारी छु । प्रशिक्षकले भन्नुभएको जस्तै प्रतियोगिता अझै बाँकी छ । हामी अन्त्यसम्म पनि लड्नेछौं,’ उनले भने ।

नेपालका लागि अन्तर्राष्ट्रिय फुटबलमा सर्वाधिक गोलको कीर्तिमान १३ गोल छ । हरि खड्का र निराजन रायमाझीको नाममा रहेको यो कीर्तिमान तोड्न कसैले सकेको छैन । उक्त कीर्तिमान तोड्न सक्नेबारे के लाग्छ भन्ने प्रश्नमा अन्जनले आफू सक्दो मिहिनेत गर्ने बताए ।

‘कीर्तिमान राख्ने सपना त भइहाल्छ । अहिलेसम्म पनि १३ गोलमा नै अड्किएको छ । मुख्य कुरा भनेको हाम्रो नेपालमा फरवार्डले मात्र गोल हान्नुपर्छ भन्ने सोच छ । तर अहिले प्रशिक्षकले जसले पनि गोल हान्न सक्छ भन्ने विश्वास गर्नुभएको छ,’ उनले थपे, ‘आज पनि मिडफिल्डरले गोल हानेको छ । मेरो पनि चाहना छ कि त्यो रेकर्ड तोड्ने । अझै मिहिनेत गर्नेछु र आशा गरौं त्यो रेकर्ड तोड्न सक्नेछु ।’

राष्ट्रिय टोलीबाट सन् २०१४ मा डेब्यु गरेका अन्जनले अधिकांश समय मिडफिल्डमा नै खेले । पछिल्लो समय भने उनले केहि आक्रामक भूमिका पाएका छन् । त्यसैले पनि अलमुताइरीको आगमनसँगै अन्जनले राष्ट्रिय टोलीबाट ४ गोल थपेका छन् । उनले इराक, चाइनिज ताइपेइ, भारत र श्रीलंकाविरुद्ध पछिल्लो केहि महिनाको अन्तरमा गोल गरेका हुन् ।

यो पनि : ‘प्रदर्शन होइन, नतिजा महत्त्वपूर्ण’ – प्रशिक्षक अलमुताइरी