काठमाडौं (हाम्रो खेलकुद) – फुटबलर सुशिल लामाले क्यान्सरसँग जुधिरहेको प्रशिक्षक नवीन न्यौपानेको परिवारलाई आर्थिक सहयोग गरेका छन् । सुशीलले आफ्नो आमाको सम्झनामा आयोजना गरेको दिल माया लामा मेमोरियल एमेच्योर फुटसल प्रतियोगिताबाट बचेको केही रकम प्रशिक्षक न्यौपानेको परिवारलाई सहयोग गरेको बताए ।

सुशीलले ३० हजार रुपैयाँ सोमबार न्यौपानेलाई हस्तान्तरण गरेका हुन् । यस कार्यमा निकेश ठकुरी र सुशील बरालले सुशीललाई सहयोग गरिरहेका छन् । सुशीलले खेलसँगै सामाजिक कार्यलाई पनि निरन्तर अघि बढाउँदै लैजाने बताए । यसअघि सुशीलले आइतबार वृद्ध आश्रममा २५ हजार रुपैयाँ बराबरको खाद्यान्न सामग्री प्रदान गरिएको बताए ।

नवीनको बुवा र आमा नै क्यान्सर रोगसँग जुधिरहेका छन् । उनीहरुको उपचार भइरहेको छ । विंगर फरवार्ड सुशीले यो सिजनको ‘ए’ डिभिजन लिगका लागि ललितपुरको फ्रेन्ड्स क्लबमा आबद्ध भएका छन् । सहारा एकेडेमी पोखराका उत्पादन २८ वर्षीय सुशीलले फ्रेन्ड्ससँगै न्युरोड टिम (एनआरटी) र मनाङ–मर्स्याङ्दीबाट लिगसँगै मोफसलका विभिन्न गोल्डकप खेलिसकेका छन् ।

सुशीलकी आमा दिल माया नेपालको राष्ट्रिय महिला फुटबल टोलीको पहिलो ब्याचकी खेलाडी हुन् । उनी आफ्नो जमानामा उत्कृष्ट फरवार्ड थिइन् । नेपालले सन् १९८६ मा पहिलोपटक अन्तर्राष्ट्रिय प्रतियोगिता खेल्दा उनले नै नेपालको आक्रमण सम्हालेकी थिइन् । उनको २०६६ सालमा निधन भएको थियो ।

सुशील, उनको खेल जीवन र आमासँग जोडिएको लेख पनि पढ्नुहोस : आमाजस्तै राष्ट्रिय टोलीबाट खेल्ने सपना छ