काठमाडौं (हाम्रो खेलकुद)– फुटबलर्स मिसन टुगेदरले अर्को महिना मेयर कप भेट्रान फुटबल प्रतियोगिता आयोजना गर्ने भएको छ । अखिल नेपाल फुटबल संघ (एन्फा) को प्राविधिक सहयोगमा कात्तिक ६ देखि १६ गते सम्म प्रतियोगिता दशरथ रंगशाला र सातदोबाटोस्थित एन्फा कम्प्लेक्सको मैदानमा आयोजना गरिने आइतबार आयोजित पत्रकार सम्मेलनमा फुटबलर्स मिसन टुलेगदरका महासचिव धिरेन्द्र प्रधानले जानकारी दिए ।

४० भन्दा माथिको टोलीको सहभागिता रहने प्रतियोगिताको प्रतिस्पर्धी टोलीले ३५ वर्षका ३ खेलाडी राख्न पाउनेछ । प्रतियोगिताको सहभागिताका लागि खुला अव्हान गरिएको बताइएको छ । आयोजकले भने १० देखि १६ टोलीको सहभागिता रहने अनुमान गरेको छ ।

खेल जीवन पश्चात पनि स्वस्थ रहन पूर्व खेलाडी, रेफ्री र प्रशिक्षकहरुलाई एकै थलोमा जमघट गराउनुका साथै सदभाव, भाइचार बढाउने उद्देश्यका साथ प्रतियोगिता आयोजना गर्न लागिएको फुटबलर्स मिसन टुगेदरका उपाध्यक्ष विज्ञानराज शर्माले बताए ।

झण्डै २५ लाख रुपैयाँ खर्च हुने प्रतियोगिताका लागि ललितपुर महानगरपालिकाले मुख्य प्रायोजन, अन्य नगरपालिकाले प्रायोजन र एन्फाले पनि आर्थिक सहयोग गर्ने टुगेदरका कोषाध्यक्ष अशोक बज्राचार्यले जानकारी दिए । प्रतियोगिताको विजेता टोलीले ५ लाख र दोस्रो हुने टोलीले २ लाख रुपैयाँ प्राप्त गर्नेछ ।

प्रतियोगिताको टिकट विक्रीबाट संकलन हुने रकमबाट अक्षय कोष स्थापना गरि त्यसको व्याजबाट आर्थिक विपन्न पूर्व राष्ट्रिय खेलाडी, रेफ्री र प्रशिक्षकहरुलाई सहयोग गर्ने मिसन टुगेदरको उद्देश्य रहेको महासचिव प्रधानले बताए ।

स्वर्गिय भइसकेका अन्तर्राष्ट्रिय फुटबल खेलाडी, रेफ्री, प्रशिक्षकहरुलाई सम्झने र फुटबल विकासका लागि एन्फालाई सहयोग गर्ने उद्देश्यका साथ केहि वर्षअघि पूर्व खेलाडीहरु विष्णुगोपाल श्रेष्ठको अध्यक्षतामा फुटबलर्स मिसन टुगेदर गठन गरेका थिए ।