एजेन्सी – म्याचेस्टर युनाइटेड प्रिमियर लिगमा शनिबार बराबरीमा रोकिएको छ । एन्ड्रोस टाउनसेन्डले लगातार दोस्रो साता गोल गरेपछि एभर्टनले युनाइटेडलाई १–१ को बराबरीमा रोकेको छ । बराबरीका कारण युनाइटेडले अंक तालिकाको शीर्षस्थानमा पुग्ने मौका गुमाएको छ ।

६५ औं मिनेटमा एब्डोयुलाय डोकोउरेको पासमा टाउनसेन्डले बराबरी गोल गरेका थिए । खेलमा अग्रता युनाइटेडले लिएको थियो । ब्रुनो फर्नान्डेजको पासमा एन्टोनी मार्सियलले ४३ औं मिनेटमा गोल गर्दै युनाइटेडलाई पहिलो हाफमा अग्रता दिलाएका थिए । फेब्रुअरी पछि प्रिमियर लिगमा मार्सियलको त्यो पहिलो गोल थियो ।

भ्रमणकारी टोली एभर्टनले पहिलो हाफमा पनि गोलका केहि मौका पाएका थिए । टाउनसेन्ड र ग्रे दुवै गोलको नजिक पुगेर चुकेका थिए । दोस्रो हाफमा मैदान प्रवेश गरेका क्रिस्टियानो रोनाल्डोको शनिबारको खेल प्रिमियर लिगको २ सयौं खेल थियो । रोनाल्डो ५७ औं मिनेटमा इन्डिसन काभानीको सट्टा मैदान प्रवेश गरेका थिए ।

यसै साता भिल्लारियलविरुद्ध च्याम्पियन्स लिगमा २–१ जितमा रोनाल्डोले निर्णायक गोल गरेका थिए । तर, एभर्टनविरुद्ध भने त्यस्तै नतिजा दिलाउन रोनाल्डो सफल भएनन् । उनी मैदान प्रवेश गरेको केहि समयमा एभर्टनले बराबरी गोल फर्काएको थियो । १–१ को बराबरीपछि एभर्टनका यरी मिनाले गरेको गोल भिएआर परिक्षणबाट अफसाइड दिएको थियो ।

युनाइटेड र एभर्टनको समान १४ अंक पुगेको छ । एक खेल कम खेलेको लिभरपुल समान १४ अंकका साथ शीर्षस्थानमा छ । युनाइटेड दोस्रो र एभर्टन तेस्रो स्थानमा उक्लेका छन् ।

प्रिमियर लिगमा शनिबारको खेल

खेल/ समय

बर्निलीविरुद्ध नर्विच सिटी साँझ ७ः४५ बेज

चेल्सीविरुद्ध साउथह्याम्टन साँझ ७ः४५ बजे

लिड्स युनाइटेडविरुद्ध वाटफोर्ड साँझ ७ः४५ बजे

उल्भरह्याम्टन वानर्डरर्सविरुद्ध न्युक्यासल युनाइटेड साँझ ७ः४५ बजे

ब्राइटन एन्ड होभ अल्बाइनविरुद्ध आर्सनल राती १०ः१५ बजे