काठमाडौं (हाम्रो खेलकुद) – साफ च्याम्पियनसिप २०२१ अन्तर्गत पहिलो खेलमा आयोजक तथा साविक विजेता माल्दिभ्सविरुद्ध खेल्ने नेपाली राष्ट्रिय फुटबल टोलीको सुरुवाती ११ सार्वजनिक भएको छ ।

प्रशिक्षक अब्दुल्लाह अलमुताइरीले नेपाललाई साविकको ४-३-३ को रणनीतिमा नै उतार्ने सम्भावना छ । गोलरक्षक किरण चेम्जोङले टोलीको कप्तानी गर्नेछन् । डिफेन्समा अनन्त तामाङ र दीनेश राजवंशी सेन्टर डिफेन्समा रहँदा सुमन अर्याल र गौतम श्रेष्ठ विंगब्याकमा छन् ।

मिडफिल्डमा पुजन उपरकोटीले रक्षात्मक भूमिका निर्वाह गर्नेछन् । तेज तामाङ र रोहित चन्द सेन्टर मिडफिल्डमा खेल्ने सम्भावना छ । आक्रमणमा सुजल श्रेष्ठ र अन्जन विष्टले नवयुग श्रेष्ठलाई साथ दिनेछन् ।

यसआघ दिनको पहिलो खेलमा बंगलादेशले श्रीलंकालाई पराजित गर्दै विजयी सुरुवात गरेको छ । बंगलादेशले १-० को जित हासिल गर्दै ३ अंक जोडेको हो । बंगलादेशको जितमा टोपु बर्मनले दोस्रो हाफमा गरेको पेनाल्टी गोल नै निर्णायक बन्यो । श्रीलंकाका डिफेन्डरले पेनाल्टी क्षेत्रभित्र ह्याण्ड गरेपछि रेफ्रीले ५६ औं मिनेटमा पेनाल्टी दिएका थिए । खेलमा श्रीलंकाका दुक्सन पुस्लासले रातो कार्ड खाएका थिए ।

नेपालले हालसम्म साफको १२ संस्करणमा खेल्दा २ पटक मात्र पहिलो खेलमा जित हासिल गरेको इतिहास छ । नेपाल पछिल्लो संस्करणमा माल्दिभ्ससँग सेमिफाइनलमा ३-० ले पराजित भएको थियो ।

यो पनि :

नेपालमाथि कमजोर सुरुवातको ‘ट्याग’

साफ च्याम्पियनसिप – नेपालको जित भन्दा हार झण्डै दोब्बर

साफ च्याम्पियनसिप : अहिले नभए कहिले ?