काठमाडौं (हाम्रो खेलकुद)

नेपाली राष्ट्रिय टोली फेरी एक पटक इतिहास रच्ने अवसरको मोडमा आइपुगेको छ । मेलेसियाको कुनिङमा जारी एएफसी सोलिडारिटी कपमा आज दिउँसो २ः१५ बजे लाओससँग सेमिफाइनल खेल्दैछ । त्यो सेमिफाइनल जित्न सके नेपाल पहिलो पटक एसियाली स्तरको प्रतियोगिताको उपाधि नजिक पुग्ने छ ।

तीन दशक भन्दा लामो अन्तर्राष्ट्रिय फुटबलको अनुभव बटुलेको नेपाली टोली अहिले सम्म क्षेत्रिय स्तरको प्रतियोगिताभन्दा माथिल्लो प्रतियोगिताको फाइनल पुग्न सकेको छैन । दक्षिण एसियाली महासंघिय (साफ) मा दुई पटक स्वर्ण पदक जितिसकेको नेपाल दक्षिण एसियाली खेलकुद (साग) यू २३ को अहिलेको च्याम्पियन हो ।

उमेर समूहतर्फ नेपाल साफ १९ को पनि च्याम्पियन हो भने गत बर्ष माघमा नेपाली टोलीले बंगबन्धु गोल्ड कप पनि जितेको थियो । तर, कुनै पनि एसियाली स्तरको प्रतियोगितामा नेपालले फाइनल सम्मको यात्रा तय गरेको छैन । एसियाली स्तरको प्रतियोगिताको सेमिफाइनलमा भने यसअघि पनि पुगिसकेको छ । सन् २००६ मा बंगलादेशमा भएको एएफसी च्यालेन्जकपको पहिलो संस्करणमा नेपाल सेमिफाइन पुगेको थियो । तर, श्रीलंकासँग पराजित हुँदै नेपाल एएफसीको प्रतियोगितामा फाइनल पुग्ने अवसर बाट बञ्चित भएको थियो । दश बर्षपछि नेपालले फेरी एकपटक एएफसीको प्रतियोगिताको फाइनल पुग्ने मौका पाएको छ ।

तर, त्यसमा नेपाली टोली कति खरो उत्रन्छ , त्यो भने हेर्न लायक हुनेछ । च्यालेन्ज कपको टोलीभन्दा अहिले पुरै परिवर्तन भइसकेको छ । अहिलेको टोलीसँग साग यू २३ र बंगबन्धु गोल्डकप जितेको अनुभव छ । तथापी च्यालेन्जकप र सोलिडारिटी कपमा अन्तर भने छ । एएफसी च्यालेन्जकप २००६ देखि नियमित रुपमा आयोजना हुँदै आएको छनोट चरणदेाि २० राष्ट्रभन्दा बढीको सहभागिता रहने प्रतियोगिता हो भने सोलिडारिटी कप यो बर्ष सुरु भएको प्रतियोगिता हो ।

एसियाली फुटबल महासंघ (एएफसी) ले विश्वकप छनोट र एसिया कप छनोटको पहिलो पहिलो र दोस्रो चरणबाट बाहिरिएका टोलीका लागि लक्षित गर्दै आयोजना गरेको प्रतियोगिता हो । यसमा ७ राष्ट्रको सहभागिता छ । बंगलादेश र पाकिस्तानले अन्तिम समयमा प्रतियोगिताबाट नाम फिर्ता लिएका थिए । यद्दपी एएफसीको आधिकारिक प्रतियोगिताको च्याम्पियन बनेर फर्कने मौका नेपाली टोली सामू छ । तर, त्यसअघि आज लाओसको चुनौति पार गर्नुपर्नेछ ।