एजेन्सी – फ्रान्सेली फरवार्ड एन्टोइन ग्रिजमन र उरुग्वेली फरवार्ड लुइस सुआरेजले खेलको अन्त्यतिर गोल गरेपछि स्पेनिस क्लब एट्लेटिको म्याड्रिडले १० खेलाडीमा समेटिएको इटालियन क्लब एसी मिलानमाथि पूनरागमन जित निकालेको छ ।

समूह ‘बी’ को खेलमा एट्लेटिकोले एक गोलले पछि परेको अवस्था उल्ट्याउँदै २–१ को पूनरागमन जित निकालेको हो । घरेलु टोलीका राफयल लियोको गोल सान्त्वना बन्यो । मिलानोमा मंगलबार राति भएको खेलको २०औं मिनेटमा राफयल लियोले गोल गर्दै घरेलु टोलीलाई १–० को अग्रता दिलाए । उनले ब्राहिम डियाजको पासमा गोल गर्न सफल भएका थिए ।

तर, अग्रता लिएको ९ मिनेट नबित्दै मिलान १० खेलाडीमा समेटिनु पर्दा समस्यामा परेको थियो । फ्रान्क केस्सी दोहोरो पहेँलो कार्ड खाँदै मैदानबाट बाहिरिएपछि मिलान २९औं मिनेटमा १० खेलाडीमा समेटिन पुगेको थियो । मिलान १० खेलाडीमा समेटिएपनि एट्लेटिकोले गोलको लागि निकै संघर्ष गर्नुपरेको थियो ।

८४औं मिनेटमा सब्सिच्युट फरवार्ड एन्टोइन ग्रिजमनले गोल गर्दै एट्लेटिकोलाई खेलमा फर्काए । ६१औं मिनेटमा कोकीको स्थानमा मैदान छिरेका ग्रिजमनले रेनान लोडीको पासमा गोल गर्न सफल भएका थिए । बराबरीतर्फ धकेलिएको खेलको इन्ज्युरी समयको थप गरिएको सातौ मिनेटमा लुइस सुआरेजले पेनाल्टीमार्फत गोल गर्दै एट्लेटिकोलाई २–१ को पूनरागमन जित दिलाए ।

कालुलुले पेनाल्टी बक्समा थोमस लेमारलाई ब्लक गर्नुका साथै हातले बल छोएको देखिएपछि रेफ्रीले भिएआरको सहायता लिदै एट्लेटिकोलाई पेनाल्टी प्रदान गरेको थियो । जसमा सुआरेज चुकेनन् । अन्तिम ६१ मिनेट १० खेलाडीमा खेल्नुपर्दा मिलानले अग्रता जोगाउन नसक्दा पराजित हुन पुग्यो ।

जितसँगै समूह ‘बी’ मा अपराजित रहेको एट्लेटिको दुई खेलबाट ४ अंक जोडेर दोस्रो स्थानमा रहेको छ । पराजित मिलान अंकविहीन हुदै पुछारमा छ । लिभरपुल ६ अंक जोडेर शीर्षस्थानमा रहँदा १ अंक जोडेको एफसी पोर्टाे तेस्रो स्थानमा रहेको छ ।

यही समूहको खेलमा लिभरपुलले पोर्टाेमाथि ५–१ को फराकिलो जित दर्ता गरेको थियो । लिभरपुलको जितमा मोहम्मद सलाह र फिर्मिनोले समान दुई गोल गर्दा साडियो मानेले एक गोल थपे । घरेलु टोलीका मेहेदी तारेमीले एक गोल फर्काए ।

अन्य नतिजा

समूह ‘ए’

पीएसजीविरुद्ध म्यानचेस्टर सिटी (२–०) र आरबी लाइप्जिगविरुद्ध क्लब ब्रुग (१–२)

समूह ‘बी’

एफसी पोर्टाेविरुद्ध लिभरपुल (१–५) र एसी मिलानविरुद्ध एट्लेटिको म्याड्रिड (१–२)

समुह ‘सी’

आयाक्सविरुद्ध बेसिक्टास (२–०) र बोरुसिया डर्टमुन्डविरुद्ध स्पोर्टिङ लिस्वन (१–०)

समूह ‘डी’

साख्तरविरुद्ध इन्टर मिलान (०–०) र रियल म्याड्रिडविरुद्ध एफसी सेरिफ (१–२)