एजेन्सी – क्याटलान क्लब बार्सिलोना स्पेनिस ला लिगामा क्याडिजसँग बराबरीमा रोकिएको छ । १० खेलाडीमा समेटिएको बार्सिलोनाले घरेलु टोली क्याडिजसँग गोलरहित बराबरीमा खेलेको हो ।

खेलको ३०औं मिनेटमा लुक डि जोङले छिटो गरी चलाएको फ्रिकिक पासलाई मेम्फिस डिपाएले प्रहार गरेपनि गोलरक्षक जेरेमिएस लिडेस्माले बचाउँदा बार्सिलोना अग्रता लिनबाट चुक्यो । ४६औं मिनेटमा अल्भारो नेग्रडोको प्रहारलाई बार्सिलोनाका गोलरक्षक मार्क आन्दर टेर स्टेगनले बचाए ।

५२औं मिनेटमा डिपाएको प्रहारमा गोलरक्षक लिडेस्मा नै बाधक बन्दा बार्सिलोनाले खेलमा अग्रता लिन सकेन । ५ मिनेटको अन्तरमा फ्रान्की डि जोङ दोहोरो पहेँलो कार्ड खाँदै मैदानबाट बाहिरिएपछि बार्सिलोना ६५औं मिनेटमा १० खेलाडी समेटिन पुगेपछि दवावमा आएको थियो ।

७५औं मिनेटमा अलफन्सो स्पिनोको लेफ्ट विङ क्रसमा रुवेन सोब्रिनोको प्रहार क्रस बारमा लागेर बाहिरिदा घरेलु टोली क्याडिज अग्रत लिनबाट चुक्यो । ८१औं मिनेटमा स्पिनोकै पासमा साल्भी सान्चेजको प्रहारलाई गोलरक्षक मार्क आन्दर टेर स्टेगनले विफल पारेपनि नियन्त्रणमा लिन नसकेको बललाई रिवाउन्डमा सोव्रिनोको प्रहारले पोस्टको दिशा लिन नसक्दा बार्सिलोना गोल खानबाट बच्यो ।

इन्ज्युरी समयको थप गरिएको चौथो मिनेटमा साल्भी सान्चेजको प्रहार ब्लक भएपछि काउन्टर अट्याकमा फिलिपे कौटिन्होले दिएको पासमा डिपाएले गोल गर्न नसक्दा बार्सिलोनाले अग्रता लिन सकेन । इन्ज्युरी समयको थप गरिएको सातौं मिनेटमा अल्बर्टाे पेरेआको प्रहारलाई भिक्टर चस्टले विफल पार्दै बार्सिलोनालाई हारबाट जोगाए ।

घरेलु टोली क्याडिजलाई बल पोसेसनमा दवावमा राखेपनि फिनिसिङमा चुुक्दा बार्सिलोना बराबरीमा रोकिन बाध्य बन्यो । बराबरीपछि अपराजित रहेको बार्सिलोनाले शीर्ष चारमा उक्लने मौका गुमाएको छ । बार्सिलोना ५ खेलबाट ९ अंक जोडेर सातौ स्थानमा रहेको छ । क्याडिज ६ अंकसहित १४औं स्थानमा रहेको छ ।

यो नतिजासँगै बार्सिलोनाले क्याडिजलाई तेस्रो खेलमा हराउन सकेको छैन । गत सिजन मात्रै शीर्ष डिभिजनमा बढुवा भएको क्याडिजले बार्सिलोनालाई २–१ ले पराजित गर्दा अर्काे खेलमा १–१ गोलको बराबरी खेलेको थियो ।

अन्य नतिजा
ग्रानडाविरुद्ध रियल सोसिडाड (२–३)
ओसासुनाविरुद्ध रियल बेटिस (१–३)