काठमाडौं (हाम्रो खेलकुद) – ललितपुरको ‘ए’ डिभिजन टोली फ्रेन्ड्स क्लब कुपन्डोलले जर्सी उत्पादक कम्पनी युक्यानको साथ पाएको छ । फ्रेन्ड्स र युक्यानबीच बिहीबार एक वर्षको लागि सम्झौता भएको हो ।

सम्झौतामा फ्रेन्ड्स क्लबका अध्यक्ष दीपक थापा र युक्यान ब्रान्डको आधिकारिक बिक्रेता सिटिएल कम्पनीका निर्देशक राजेन महर्जनले हस्ताक्षर गर्दै आदान–प्रदान गरे ।

सम्झौतापछि फ्रेन्ड्सले नयाँ सिजनमा लगाउने जर्सी पनि सार्वजनिक गरिएको थियो । एन्फा अध्यक्ष कर्माछिरिङ शेर्पा, उपाध्यक्ष उपेन्द्रमान सिंह, क्लबका अध्यक्ष दीपक थापा, युक्यानका राजेन महर्जन र क्लबका कप्तान प्रकाश बुढाथोकीले जर्सीसार्वजनिक गरेका थिए ।

युक्यानका राजेन महर्जनले फुटबल व्यवसायिक होस् भन्ने चाहनाका साथ फ्रेन्ड्ससँग जोडिएको बताए । ‘यो नयाँ सामग्री हो । हामी पहिलोपटक नै ‘ए’ डिभिजन टोलीसँग जोडिएका छौं । इतिहास बोकेको क्लबलाई नयाँ जर्सी फापोस भन्ने शुभकामना छ ।’ केही नयाँ गरौैं भन्ने सोच हो । सहकार्य बढ्दै जानेछ ।’ सम्झौता पछि महर्जनले भने ।

फ्रेन्ड्स क्लबका अध्यक्ष दीपक थापाले युक्यानको साथले टोलीमा मनोवल थप बढेको र केही दिनमै टिमसँगै मुख्य प्रायोजक र प्रायोजकसँग सम्झौताको कार्यक्रम राखिने बताए । उनले फ्रेन्ड्स अब ५० वर्ष अघिको जस्तै बलियो टोली बन्न र क्लबको स्वर्ण जयन्ती केही खास हुने बताए ।

एन्फाका अध्यक्ष कर्माछिरिङ शेर्पाले निजी कम्पनी युक्यानसँगै अन्य अन्य कम्पनीहरु फुटबलमा जोडिनु शुभ संकेत रहेको बताए । अध्यक्ष शेर्पाले टोलीलाई सफलताको शुभकामना दिदै कोभिडपछि फुटबल तग्रिने प्रयासमा रहेको बताए । क्लबका निवर्तमान अध्यक्ष राजीव पौडेलले निरन्तर प्रयास गर्दा सफल हुँदै जाने उदाहरण युक्यान फ्रेन्ड्ससँग जोडिनु रहेको बताए ।

यस वर्षको शहिद स्मारक ‘ए’ डिभिजन लिग २९ कात्तिकदेखि शुरु हुदैछ । त्यसका लागि फ्रेन्ड्सले टोली निर्माण गरिरहेको छ । प्रकाश बुढाथोकी लामो समयपछि क्लबमा फर्किएका छन् । सुशील लामा पनि फ्रेन्ड्समा अनुबन्ध भइसकेका छन् । भारतीय आइ लिग खेलेका विदेशी खेलाडी भित्र्याउने तयारी भइरहेको क्लबले जनाएको छ ।