एजेन्सी – इंग्लिस क्लब एभर्टनका कोलम्वियन मिडफिल्डर हामेस रोड्रिग्वेज कतारी क्लब अल–रेयानमा अनुबन्धित भएका छन् ।स्पेनिस क्लब रियल म्याड्रिड र जर्मन क्लब बायर्न म्युनिखका पुर्व मिडफिल्डरलाई कतारी क्लब अल–रेयानले अनुबन्ध गरेको हो ।

सम्झौता रकम र अवधिबारे केही खुलाइएको छैन । उनी यसै साता कतार प्रस्थान गर्नेछ । हामेस गत सिजन ७ मिलियन पाउन्डमा एभर्टनमा पुगेका थिए । एभर्टनका प्रशिक्षक राफयल बेनिटेजले यो सिजन गुडिसन पार्कमा उनको लागि कुनै स्थान नरहने बताएपछि उनले नयाँ विकल्प रोजेका हुन् ।

उनले कतार विश्वकप २०२२ लाई ध्यानमा राख्दै नियमित फुटबल खेल्नको लागि पनि कतारी क्लब रोजेको अनुमान गरिएको छ । कोलम्वियाको कप्तान समेत रहेका रोड्रिग्वेज पछिल्ला समय चोटका कारण टोली बाहिर रहेका छन् । कोलम्वियाका प्रशिक्षक रेनाल्डो रुएडाले पनि हामेसलाइ टोलीमा चाहेका छन् ।

कोलम्विया विश्वकपमा छनोट हुन बाँकी छ । यसै मसहना (सेप्टेम्वर) मा विश्वकप छनोटको खेल हुदा उनले चोटका कारण खेल गुमाएका थिए ।कतार स्टार्स लिगमा अल–रेयानले यो सिजन दुई खेल खेल्दा दुवैमा जित निकाल्न सफल भएको छ । अब प्रशिक्षक लरेन्ट ब्लांकको सुचीमा हामेस पनि रहनेछन् । हामेसले गत सिजन एभर्टनका लागि २६ खेल खेल्दा ६ गोल गरेका थिए । यो सिजन उनले एक खेलमा पनि मौका पाएका छैनन् ।